8,5 mln teńge, balabaqshaǵa basymdyq – Aýyl dárigerlerine qandaı qoldaý qarastyrylǵan

ASTANA. KAZINFORM – Densaýlyq saqtaý mınıstri Aqmaral Álnazarova aýyldyq jerlerdegi medıtsınalyq kadr tapshylyǵy máselesi qalaı sheshiletinin aıtyp berdi.

– Siz baıandamańyzda kadr tapshylyǵy máselesin aıtyp óttińiz. Rasynda da ásirese aýyldyq jerlerde bul óte ózekti másele. Muny naqty qalaı sheshemiz?, – dep suraq qoıdy Premer-mınıstr Oljas Bektenov Densaýlyq saqtaý mınıstri Aqmaral Álnazarovaǵa.

Óz jaýabynda Densaýlyq saqtaý mınıstri byltyr Memleket basshysynyń arnaıy tapsyrmasymen aýyldyq jerlerge baratyn dárigerlerge qosymsha áleýmettik qoldaý sharalary qabyldanyp, zańmen bekitilgenin atap ótti.

– Aýyldyq eldi mekenge jumys isteý úshin kelgen suranysqa ıe dárigerlerdiń 8,5 mln teńge kóterme tólemaqy alýǵa múmkindigi bar. Ekinshiden, aýylǵa baratyn jas mamandarǵa úıdi satyp alý nemese baspana salý úshin bıýdjettik kredıt mólsheri ulǵaıtyldy. Bıýdjettik kredıt stavkasy 0,01% quraıdy, bul jaqsy qoldaý dep aıtýǵa bolady. Sonymen birge, medıtsınalyq qyzmetkerler balalaryn balabaqshaǵa berý úshin jergilikti jerde basymdyq berý máselesi zań aıasynda qarastyrylǵan. Eń bastysy, zań aıasynda barlyq tıisti áleýmettik qoldaý sharalary bolǵanymen jergilikti atqarýshy organdarǵa muny nazarǵa alyp, medıtsınalyq qyzmetkerlerge basymdyq berý suralady, – dedi Aqmaral Álnazarova.

Alaıda, mınıstr byltyr aýylǵa jumysqa ornalastyrylǵan 370 jas mamannyń tek qana 254-i (70%) kóterme tólemaqy alǵanyn aıtty. Aqmola, Jambyl, Batys Qazaqstan jáne Abaı oblystarynda ólim-jitimniń joǵary kórsetkishterine qaramastan, kóterme tólemaqy qarastyrylmaǵan.

Aıta keteıik, Prezıdent medıtsına qyzmetkerlerine qarsy kúsh qoldanǵandarǵa jazany qatańdatý jóninde Úkimetke tapsyrma berdi.