85 áleýmettik nysandy termojańǵyrtý jylyna 400 mln teńge únemdeıdi
ASTANA. QazAqparat - «Elektr energetıkasyn damytý jáne energııa únemdeý ınstıtýty» AQ Basqarma tóraǵasy Baýyrjan Smaǵulov elimizde energııany únemdeý baǵytynda qandaı jumystar atqarylyp jatqanyn aıtyp berdi, dep habarlaıdy QazAqparat tilshisi.
«Elimizde qazirdiń ózinde energııa únemdeý boıynsha jańa tehnologııalardy engizgen elektrolızdi, alıýmındi iri zaýyttar bar. Energııa tıimdiligine baǵyttalǵan tyń jobalardyń arqasynda 2012-2018 jyldar aralyǵynda elimizde 200 mlrd teńge qarajat únemdeldi. Eger áleýmettik nysandardyń termomodernızatsııalary iske asyrylatyn bolsa - 85 nysan boıynsha biz jylyna 400 mln teńgeni únemdeı alar edik», - deıdi Baýyrjan Smaǵulov OKQ-da ótken baspasóz máslıhatynda.
Baqytbek Smaǵulov sonymen birge, energııa únemdeýdiń memlekettik saıasatyn iske asyrýda ınstıtýttyń róli týraly áńgimelep berdi. Onyń aıtýynsha, qazirdiń ózinde 85 áleýmettik nysan tańdalynyp, sonyń ishinde 42 mektep, 23 balabaqsha, 12 medıtsınalyq mekeme, Qazaqstannyń barlyq óńirlerindegi 8 kóshe jaryqtandyrýy boıynsha energııa tıimdiligin arttyrý jumystary júrgizilýde.
«Energetıkalyq monıtorıng nátıjesi boıynsha, jylýmen jabdyqtaýǵa arnalǵan jyl saıynǵy únemdeýdiń ortasha mólsheri 30 paıyzdy, al elektr energııasyna 15 paıyzdy qurady. Máselen, Qaraǵandyda №17 orta mektepte energııa tutynýdyń jalpy kólemi jylyna 19 paıyz boldy. Áýlıekól ortalyq aýrýhanasynda jańǵyrtý jylyna 17 mln teńgeden astam kommýnaldyq shyǵyndy qysqatýǵa múmkindik berdi. Qaraǵandy oblysyndaǵy Saran qalasynda 212 kóshe jaryqtandyrý aspaptaryn almastyrǵannan keıin jyl saıynǵy joǵary únem mólsheri shamamen 60 paıyzǵa jetti. Ol únemdi aqshaǵa eseptegende 1,8 mln teńge», - deıdi ol.
