843 myń teńge aıyppul: Almatyda gaz eseptegishterin tekserýde zań buzýshylyq anyqtaldy
ASTANA. KAZINFORM — Almaty qalasy boıynsha Tehnıkalyq retteý jáne metrologııa komıteti departamenti Almaty qalasyndaǵy «AKTOBE GAZ INNOVATION» JShS-niń Almaty fılıalynyń salystyryp tekserý zerthanasyna qatysty jospardan tys tekserý júrgizdi. Bul týraly Saýda jáne ıntegratsııa mınıstrligi málim etti.
Atalǵan jospardan tys tekserý jeke tulǵanyń «Ólshem birligin qamtamasyz etý týraly» Qazaqstan Respýblıkasy Zańynyń, sondaı-aq metrologııa salasyndaǵy ózge de normatıvtik quqyqtyq aktiler men normatıvtik qujattardyń talaptaryn saqtaý máselesi boıynsha joldanǵan ótinishi negizinde júrgizildi.
— Tekserý barysynda ST RK 2.13-2013 «Turmystyq gaz eseptegishteri. Salystyryp tekserý ádisteri men quraldary» standartynyń 9.1-tarmaǵynyń jáne Qazaqstan Respýblıkasy Investıtsııalar jáne damý mınıstriniń 2018 jylǵy 27 jeltoqsandaǵy № 934 buıryǵymen bekitilgen Ólshem quraldaryn salystyryp tekserýdi júrgizý, ólshem quraldaryn salystyryp tekserý kezeńdiligin belgileý jáne salystyryp tekserý sertıfıkatynyń nysany qaǵıdalarynyń 21-tarmaǵynyń talaptary buzylǵany anyqtaldy, — delingen habarlamada.
Tekserý nátıjeleri boıynsha «AKTOBE GAZ INNOVATION» JShS-niń Almaty fılıalyna 2025 jylǵy 29 qańtardaǵy № FR-07-56929 qoldanýǵa jaramsyzdyǵy týraly habarlamanyń kúshin joıý jóninde nusqama berilip, Qazaqstan Respýblıkasy Ákimshilik quqyq buzýshylyq týraly kodeksiniń 415-1-baby boıynsha ákimshilik quqyq buzýshylyq týraly hattama toltyryldy.
— Quqyq buzýshynyń kinásin moıyndaýyna baılanysty oǵan 843 375 teńge mólsherinde aıyppul túrindegi ákimshilik jaza qoldanylyp, qyzmeti alty aı merzimge toqtatyldy, sondaı-aq anyqtalǵan buzýshylyqtardy joıý týraly nusqama berildi, — dep habarlady vedomstvodan.
Qazirgi ýaqytta aıyppul tolyq kólemde tólendi.
Departament tizilimge engizilmegen jáne salystyryp tekserilmegen ólsheý quraldaryn paıdalaný Zań buzýshylyq bolyp tabylatynyn eske saldy.
Osyndaı Zań buzýshylyqtar anyqtalǵan jaǵdaıda azamattarǵa tehnıkalyq retteý jáne metrologııa jónindegi aýmaqtyq organdarǵa júginýge keńes beriledi.
Buǵan deıin QR Saýda jáne ıntegratsııa mınıstrliginiń Tehnıkalyq retteý jáne metrologııa komıtetiniń Aqmola oblysy boıynsha departamenti «QazGaz Corporation» JShS gaz quıý stantsııasyn ákimshilik jaýapkershilikke tartqan bolatyn.
