84 eldi mekendi sý tasqynynan qorǵaý boıynsha 56 joba iske asyrylyp jatyr - mınıstrlik
ASTANA. KAZINFORM - Sý resýrstary jáne ırrıgatsııa mınıstrligi 6 oblys ákimdigimen birlesip eldi mekenderdi kóktemgi sý tasqynynan qorǵaý úshin 56 jobany iske asyryp jatyr.
Aqmola, Aqtóbe, Batys Qazaqstan, Pavlodar, Soltústik Qazaqstan jáne Qostanaı oblystarynda 580 myń turǵyny bar 84 eldi mekenniń qaýipsizdigin qamtamasyz etý josparlanyp otyr.
Jobalar aıasynda jalpy uzyndyǵy 310 shaqyrym bóget salý qarastyrylǵan. Búgingi tańda bul jumystardyń shamamen 40%-y oryndaldy.
- Osyǵan deıin mınıstrliktiń basseındik ınspektsııalary TJM jáne ákimdiktermen birlesip elimiz boıynsha 1502 gıdrotehnıkalyq qurylysqa zertteý júrgizdi. Tekseris qorytyndysy boıynsha gıdrotehnıkalyq qurylystardyń ıelerine anyqtalǵan kemshilikterdi joıý boıynsha usynystar berildi. Kóktemgi sý tasqynyn qabyldaý úshin bos syıymdylyqtardy qamtamasyz etý maqsatynda elimizdiń soltústigi, batys, shyǵys jáne ortalyq aımaqtaryndaǵy sý qoımalarynan sý jiberý jumysy jalǵasýda, – dedi Sý resýrstary jáne ırrıgatsııa vıtse-mınıstri Erbolat Ibraıhanov.
Osyǵan deıin Sý resýrstary jáne ırrıgatsııa mınıstrliginiń sý tasqyny kezeńine daıyndyq júrgizip jatqany týraly jazǵan edik.