83 jastaǵy qarııa koronavırýstan emdelip shyqty

ALMATY. QazAqparat – Almatyda 83 jastaǵy aqsaqal koronavırýstan emdelip shyqty. Bul týraly qalalyq balalar klınıkalyq juqpaly aýrýlar aýrýhanasynyń bas dárigeri Erjan Seralın aıtty, dep habarlaıdy QazAqparat tilshisi.

Búgin ótken baspasóz máslıhatynda Erjan Seralın pedıatrlardyń eresekterdi emdeýge qalaı beıimdelgenin aıtty.

Pandemııa bastalǵan kezde qalalyq Balalar klınıkalyq juqpaly aýrýhanasynyń jartysynda eresek adamdarǵa arnalǵan Covid-19 gospıtali ashylǵan bolatyn.

«Bizdiń balalar aýrýhanamyz, bizdiń dárigerler eresek adamdardy emdeýge tez beıimdeldi. Stýdentter arasynda pedıatrlar terapııa jáne basqa da mamandyqtar boıynsha eresekter men balalarǵa qatysty jan-jaqty jáne aralas mamandyqtarda barlyq bazalyq pánder ótedi. Sonymen qatar, qajet bolǵan jaǵdaıda, biz qalanyń barlyq qajetti mamanynan tolyq kólemde medıtsınalyq kómek kórsetý úshin keńes alýǵa múmkindigimiz bar. Tipti, jaqynda bizdiń dárigerler 83 jastaǵy qarııany sátti emdep jazdy», - dedi E.Seralın.