82 jastaǵy mıllıarder Soros úılenetinin jarııalady
ASTANA. 12 tamyz. QazAqparat - Ataqty qarjyger jáne mıllıarder Djordj Soros óziniń 82 jasqa tolýyn merekeleý kezinde 40 jastaǵy Tamıko Boltonǵa úılenetinin jarııalady, dep jazady Ýtro.rý.
Bul Soros úshin úshinshi, al onyń qalyńdyǵy úshin - ekinshi nekelesý bolmaq. Soros Boltonǵa Graff fırmasynyń platınadan jasalyp, gaýhar qondyrylǵan qyzǵylt altyn neke saqınasyn syıǵa tartty. Aldaǵy úılený toıy bolatyn kún ázirge habarlanǵan joq.
Soros pen Bolton 2008 jylǵy kóktemde tanysqan bolatyn. Ataqty ınvestordyń qalyńdyǵy buryn Internette tamaq qospalaryn satýmen aınalysty, al qazir ıoga onlaın-sabaqtaryn usynatyn kompanııaǵa ıelik etedi.
Qarjyger Sorostyń shyn aty - Derd Shorosh, ol 1930 jyly 12 tamyzda Býdapeshtte jergilikti evreı qaýymynyń kóshbasshysy Tıvard Shvartstyń otbasynda dúnıege keldi. 1936 jyly Shvartstyń otbasy tegin Shorosh dep ózgertti. Keıbir ǵumyrnamashylar sóıtip evreı otbasy natsıster tarapynan qýǵynnan saqtanǵysy kelgen bolýy kerek, dep paıymdaıdy. 1947 jyly Shoroshtar jalǵan tólqujatpen Ulybrıtanııaǵa qonys tepti, onda Djordj (ol da esimin aǵylshynǵa ózgertti) London ekonomıka mektebine oqýǵa túsip, ony oıdaǵydaı bitirdi.
Onyń mansaptyq samǵaýy 1956 jyly bastaldy, sol kezde onyń londondyq dostarynyń biriniń ákesi Djordjdy Ýoll-strıttegi brokerlik keńsesine shaqyrdy. Qarjyger baǵaly qaǵazdardy bir elden ekinshisine alyp-satýmen aınalysty. Onyń isi oıdaǵydaı júrip jatty, Soros kompanııanyń vıtse-prezıdentine deıin kóterildi, al 1967 jyly óziniń bastyǵyna offshorlyq aımaqta ınvestıtsııalyq qor ashý jóninde jańa joba usyndy, al ózi ony basqaratyn boldy. Eki jyldan keıin ol kompanııanyń basshysy jáne Double Eagle hedj-qory ıegerleriniń biri boldy. Ol keıinnen Sorosqa baılyq pen dańq ákelgen ataqty Quantum Group kompanııasyna aınaldy.
