82 jastaǵy qarııany sýdan qutqarǵan semeılik ofıtser marapattaldy
SEMEI. QazAqparat - Semeıde sýǵa batyp bara jatqan qala turǵynyn qutqaryp qalǵan Ulttyq ulan ofıtseri Aıbek Isaev Shyǵys Qazaqstan oblysy Tótenshe jaǵdaılar departamentiniń Alǵys hatymen marapattaldy, dep habarlaıdy QazAqparat.
Eske sala keteıik, bıyl 30 naýryzda Ertis jaǵalaýynda əskerı qyzmettik sholý júrgizý kezinde 5511 əskerı bóliminiń leıtenanty, rota komandıriniń orynbasary Aıbek Isaev kómekke shaqyrǵan er adamnyń daýysyn estıdi. Birden kómekke umtylǵan azamat 82 jastaǵy qart balyqshyny batyp bara jatqan jerinen qutqaryp qalady.
Balyqshyny jaǵaǵa aman alyp shyqqan ofıtser keıin qutqarýshylarǵa habar bergen.
«Men aıǵaılaǵan daýysty estigen bette esh oılanbastan kómekke umtyldym. Jaǵaǵa kıimderimdi sheship, qolyma taqta alyp ózenge bettedim. Muz erip jatqandyqtan barynsha araqashyqtyqty saqtaýǵa tyrystym. Jəne zeınetkerge men aıtqan nusqaýlyqty oryndaýdy ótindim. Sebebi, ekeýmizdiń de ómirimizge qaýip tónip turǵan edi. Zeınetker meniń aıtqanymdy durys oryndady. Osylaısha, ony jaǵaǵa aman alyp shyqtym», - dedi Aıbek Isaev.
Óz ómirin qaýipke tigip, erlik kórsetken əskerı qyzmetkerdiń erligin Shyǵys Qazaqstan oblysy Tótenshe jaǵdaılar departamentiniń basshylyǵy eleýsiz qaldyrmady. Ol TJD-niń bastyǵy, azamattyq qorǵanys polkovnıgi Nurlan Madıarovtyń Alǵys hatymen marapattaldy.
