82 myń astanalyq qoǵamdyq kólikte tegin júredi
ASTANA. QazAqparat - Astananyń 82 myń turǵyny qoǵamdyq kólik qyzmetin tegin paıdalana alady, dep habarlady qalalyq ákimdiktiń baspasóz qyzmetinen.
«Búginde Astanada turatyn 82 myń adam jeńildikter qarastyrylǵan topqa kiredi. Oǵan UOS qatysýshylary jáne oǵan teńestirilgender (2 208 adam), zeınetkerler (57 452 adam), 1, 2, 3 toptaǵy múgedekter (13 295 adam), qarýly kúsh qurylymdarynyń zeınetkerleri (5 144 adam), kópbalaly analar (3 809 adam) jatady. Bular úshin qoǵamdyq kólikte júrý tegin», - delingen habarlamada.
Jolaýshylar kóligi jáne avtomobıl joldary basqarmasynan habarlaǵandaı, jeńildikter qarastyrylǵan adamdardy qoǵamdyq kólikte tegin tasymaldaý úshin 2014 jyly 1 154 843,0 myń teńge jumsalady. Eske sala keteıik, Astana qalalyq máslıhatynyń depýtattary shahardaǵy qoǵamdyq kólikte júrý tarıfiniń kóterilýin quptady. Endi qoǵamdyq kólikte júrý quny eresekter úshin 90 teńge, al balalar úshin 40 teńge bolady.
