№ 82 «Daryn» lıtseıi alǵashqy túlekterin ushyrdy (FOTO)
ASTANA. QazAqparat - Búgin Astana qalasyndaǵy № 82 «Daryn» mamandandyrylǵan lıtseıde alǵashqy túlekterdi shyǵaryp salýǵa arnalǵan saltanatty is-shara ótti.
Aıta ketý kerek, ótken jyly irgesi qalanǵan bilim ordasy daryndy balalardy tárbıeleýge baǵyttalǵan. Bul lıtseıdiń maqsaty - ulttyq jáne jalpy adamzattyq qundylyqtar, ǵylym men tájirıbe jetistikteri negizinde ár oqýshynyń tabıǵı zııatkerlik qabiletterin jan-jaqty damytý, daryndy balalardy shyǵarmashyl tulǵa retinde qalyptastyrý úshin jaǵdaı jasaý.
Elordadaǵy № 38 lıtseıde oqyǵan shákirtter jeltoqsan aıynan bastap osy jańa bilim ordasyna aýysqan bolatyn. Búgin 24 shákirt lıtseıdi bitirip otyr. Onyń ishinde tórteýi «Altyn belgi» mártebesin qorǵaıtyn bolady. Birneshe oqýshylar halyqaralyq baıqaýlardyń jeńimpazdary men júldegerleri.
Lıtseı ujymyna jáne jas túlekterge arnaǵan sózinde QR Bilim jáne ǵylym mınıstrliginiń jaýapty hatshysy Ámirhan Rahymjanov táýelsiz memleketimizde jas urpaqtyń bilim alýyna barlyq jaǵdaı jasalyp otyrǵanyn atap ótti. Elimizdegi beıbitshilik pen turaqtylyq, ultaralyq kelisim barlyq jetistikterimizdiń negizi ekenin aıtty. Osy bilim ordasynan bolashaqta ǵalymdar da, ushqyshtar da, qoǵam qaıratkerleri de shyǵatynyna senim bildirdi.
№ 82 «Daryn» mamandandyrylǵan lıtseıiniń dırektory, «Qurmet» ordeniniń ıegeri, QR Eńbek sińirgen qaıratkeri Jamal Qasymbek alǵashqy bitirýshilerdiń orny bólek ekenin jáne 2016 jyldyń túlekteri el tarıhyndaǵy erekshe jylda, ıaǵnı, Qazaqstan táýelsizdiginiń 25 jyldyǵy qarsańynda qııaǵa qanat qaǵyp, úlken ómir jolyna attanyp otyrǵandaryn atap ótti. Barlyq túlekterge aq jol tiledi.
Lıtseı túlekteri atynan Arýjan Dáribaı sóz sóılep, tálim bergen ustazdaryna alǵysyn bildirdi. Oqýshylardyń ata-analary da bilim ordasynyń ujymyna tabystar tilep, raqmet aıtty.
Saltanatty is-shara sońǵy qońyraý soǵylýymen aıaqtaldy.
