81 jastaǵy saıahatshy qazaq áje «KFC» jegendi unatady eken - nemeresiniń áńgimesi (FOTO)
ASTANA. QazAqparat - Seksenge taqaǵan tusynda Lena apa ómirinde alǵash ret shet elge shyqqan edi. Jasyratyn nesi bar, urpaǵynyń qamyn oılaǵan qazaqtyń qarııalary bul jasta bala-shaǵasynyń tileýin tilep, nemere-shóberesin baǵyp otyrady. Tipti, kóbi álemniń eń keremet elderine emes, «ana jaqqa» saparlap ketemiz be dep qorqyp otyrady.
Oqyrmandarǵa qyzyq bolady degen oımen, qazaq aýdıtorııasyna qatty unaıtyn jáne sońǵy tórt jyl ishinde Anglııa, Frantsııa, Ispanııa, Taıland pen AQSh-ty aralaǵan Lena Toqsanbaevanyń nemeresi Aıdyn Toqsanbaevamen áńgimelesken edik. Aıtpaqshy, bıyl saıahatshy ájeniń nemereleri men balalary Lena apany qasıetti Mekkege ertip barmaq eken...
- Aıdyn, bilýimizshe, ájeńizben birge sońǵy ret AQSh-ty aralap keldińizder. Jalpy, Nıý-Iork qalasyna bararda ájeńizben aqyldastyńyz ba?
- Biz buǵan deıin de Amerıkaǵa barǵanbyz. Al, qazir Nıý-Iorkte meniń úlken ápkem bilim alyp jatyr. Árıne, qaıda saparlasaq ta, biz aldymen ájemizben aqyldasamyz. Eger ájem qalamasa, onda biz de eshqaıda barmaımyz.
- Lena apanyń densaýlyǵy alys saparlardy aýyrsynyp júrgen joq pa?
- Joq, alǵash ret apam Londonǵa bardy, sońǵy ret Nıý-Iorkti aralady. Osyndaı alys saparlarda Qudaıǵa shúkir, ájem sharshamady. Tipti, dárigerler «ájeńizdiń júrek soǵysy on segizdegi qyzdyń júregindeı» degen edi.
- Siz ájeńizdiń sýretteri men beınerolıkterin áleýmettik jelige kóp júkteısiz. Sýretterge qarasaq, ájeńiz ómirge qushtar jan ekenin baıqaımyz. Jalpy, Lena ájeıdiń minezi týraly, jańashyldyqtarǵa degen kózqarasy týraly aıtyp berińizshi?
- Ájem rasymen de ómirdi súıetin, minezi keremet adam. Ájem bizdiń usynystarymyzdy qoldap otyrady, solaı bola tura, aqylshymyz retinde shekten shyǵýǵa jol bermeıdi. Ol meniń týǵan ájem, al, ájesin kim jaman desin...Bala-shaǵasyna kelgende óte jumsaq, biraq, beıtanys adamdarmen birden sóılesip ketýi ekitalaı.
- Lena ájege barǵan elderdiń tamaǵy unaı ma?
- Saıahattap barǵan jerimizdiń tamaǵyna kelgende, másele týyndaı bastaıdy. Mysaly, Anglııaǵa bararda ájem qazy salyp alǵan edi. Al, Ispanııa men Frantsııaǵa qazy alyp shyǵa almadyq, olarda tyıym salynǵan eken. Biraq, amalyn taýyp, qazy salyp almaǵanyma qatty ókindim, óıtkeni, ájem osy eki eldiń tamaǵyn súısinip jeı qoımady. Kóbine nan men makaron jegen ájem «qazy-qarta salyp alǵanda ǵoı...» dep, «ókpesin» aıta berdi. Taılandqa kelgende, ájem balyq jedi. Al, AQSh-ta nemeresi oqyp jatqan soń, as-sýyn sol ázirlep berdi. Bir qyzyǵy, ájem fas-fýdty, sonyń ishinde, «KFC» jegendi unatady. Tipti, Almatyda anda-sanda baryp turamyz.
- Lena ájeniń alty balasy, 17 nemeresi, 12 shóberesi bar eken. Saıahattaǵan kezde, «men baramyn» degen talas bolmaı ma?
- Ájem meniń ákemniń qolynda turady. Sondyqtan, qaıda barsa da bizdiń otbasymen birge júredi. Esesine, biz de shet elge saıahattaıtyn bolsaq, «ájem bara ma, joq pa?» demeımiz, sebebi, ájem barmasa, biz de eshqaıda barmaımyz degen sóz. Kóbine, ákem jumystan bosaı almaıdy, sondyqtan, anam, men, ájem, ıaǵnı, «qyzdar» qydyramyz.
- Al, qasıetti Mekke qalasyna qashan barasyzdar?
- Alla jolyn berse, bıyl baryp qalamyz degen jospar bar. Alla sátin salsyn deımiz.
- Suhbatyńyzǵa raqmet! Lena ájeńizge Alla álemdi aralaıtyn kúsh-qýat bersin!
