81 jastaǵy marafonshy Saltanat Túıtebaev Eńbek ardageri atandy
ASTANA. KAZINFORM – Týrızm jáne sport vıtse-mınıstri Serik Jarasbaev halyqaralyq marafondarda el namysyn qorǵap júrgen ardager sportshy Saltanat Túıtebaevqa «Eńbek ardageri» tósbelgisin tabystady.
Mınıstrlik málimetinshe, 81 jastaǵy marafonshy jýyrda Keıptaýn qalasynda ótken halyqaralyq marafonda úzdik ondyq qataryna engen.
Kezdesý barysynda Saltanat Túıtebaevtyń uzaq jyldyq eńbegi men sportqa degen adaldyǵy óskeleń urpaqqa úlgi ekeni atap ótildi.
– Seksenniń seńgirine sergek jetip, uzaq qashyqtyqtaǵy marafondy baǵyndyrýyńyz – úlgi tutarlyq jetistik ári elimiz úshin zor qýanysh. Sebebi salamatty ómir saltyn qalyptastyrýǵa baǵyttalǵan memlekettik saıasattyń jarqyn kórinisi sizdiń bolmysyńyzdan aıqyn baıqalady. Buǵan deıin de birneshe márte júldeli oryndardan kórinip kelesiz. Osy arqyly tabandylyq pen qajyrly eńbektiń naqty úlgisin kórsetip, kópshilikke ónege boldyńyz, – dedi Serik Jarasbaev.
Halyqaralyq dárejedegi sport sheberi Saltanat Túıtebaev 1945 jyly Moıynqum aýdany dúnıege kelgen.
Eńbek jolyn ustazdyqtan bastap, mektep dırektory, bilim bóliminiń ınspektory jáne kásiptik-tehnıkalyq ýchılışe basshysy qyzmetterin atqarǵan.
Ardager sportshy sońǵy jyldary halyqaralyq marafondarda joǵary nátıje kórsetip keledi.
Ol Sıngapýr, Dýbaı, Doha, Antalııa, Malaga jáne Amsterdam qalalarynda ótken halyqaralyq jarystardyń jeńimpazy atanǵan.
2016 jyly Pert qalasynda ótken álem chempıonatynda 70+ sanatynda kúmis júlde ıelense, 2017 jyly Oklend qalasynda ótken Ardagerler olımpıadasynda chempıon atanǵan.
Sondaı-aq 2021 jyly Nıý-Iork marafonynda 75+ jas sanatynda ekinshi oryn alǵan.
Aıta keteıik, 80 jastaǵy astanalyq marafonshy jaraqatyna qaramastan Keıptaýnda márege jetti.
