81 jábirlenýshi isi: Prokýror sottalýshy Merýert Ospanovaǵa qatysty jazany jarııalady
ASTANA. KAZINFORM — Astanada alaıaqtyq isi boıynsha sot jaryssózinde memlekettik aıyptaýshy sottalýshy Merýert Ospanovany Qazaqstan Respýblıkasy Qylmystyq kodeksiniń 190-babynyń 4-bóligi boıynsha kináli dep tanyp, oǵan 6 jyl 8 aı merzimge bas bostandyǵynan aıyrý jazasyn taǵaıyndaýdy surady.
Prokýrordyń aıtýynsha, sot tergeýi barysynda Ospanovanyń azamattardy «Damý» qory arqyly júzege asyrylatyn memlekettik jeńildetilgen nesıeleý baǵdarlamasy bar degen jeleýmen jańylystyrǵany tolyq dáleldengen. Aıyptaý nusqasy boıynsha, ol osy shema arqyly 81 azamattyń atyna bank nesıelerin rásimdetip, qarajatty óz baqylaýyndaǵy esepshottarǵa aýdartqan.
Memlekettik aıyptaýshy sotta Ospanovanyń taǵylǵan aıypty tolyq moıyndaǵanyn atap ótti. Onyń aıtýynsha, sottalýshy jábirlenýshilerden túsken qarajatty burynǵy qarjylyq mindettemelerin óteýge, qaryzdaryn jabýǵa jáne basqa da shyǵyndarǵa jumsaǵanyn rastaǵan. Sondaı-aq qarajattyń bir bóliginiń keıingi klıentterdiń esebinen burynǵylar aldyndaǵy mindettemelerdi óteýge baǵyttalǵanyn kórsetken.
Prokýrordyń sózinshe, sotta jaýap bergen 81 jábirlenýshiniń aıǵaqtary ózara sáıkes keledi jáne alaıaqtyqtyń biryńǵaı mehanızmin kórsetedi. Olar Ospanovanyń keńsesine memlekettik baǵdarlama arqyly tómen paıyzben nesıe rásimdeýge bolady degen jarnamalar men usynymdar negizinde júgingenderin aıtqan. Keıin olardyń atyna banktik nesıeler rásimdelgenimen, qarajat ózderine berilmegen.
Sot barysynda jaýap alynǵan kýálar kompanııa qyzmetkerleri de barlyq uıymdastyrý jumystaryn, qyzmetkerlerge tapsyrma berýdi jáne qarjylyq sheshimderdi Ospanovanyń ózi qabyldaǵanyn kórsetken. Olardyń aıtýynsha, ózderi tek tehnıkalyq jáne uıymdastyrýshylyq mindetterdi oryndaǵan ári klıentterdiń qarajatynyń keıingi qozǵalysy týraly aqparatqa ıe bolmaǵan.
Memlekettik aıyptaýshynyń pikirinshe, jábirlenýshilerdiń, kýálardyń, sondaı-aq sottalýshynyń moıyndaý jaýaby men is materıaldaryndaǵy jazbasha dáleldemeler Ospanovanyń kinásin tolyq dáleldeıdi.
Osyǵan baılanysty prokýror sottan Merýert Ospanovany Qylmystyq kodekstiń 190-babynyń 4-bóligi boıynsha kináli dep tanyp, 6 jyl 8 aı merzimge bas bostandyǵynan aıyrýdy, múlkin tárkilemeýdi jáne nesıeleý salasynda qyzmet kórsetýge baılanysty laýazymdardy 10 jyl boıy atqarý quqyǵynan aıyrýdy surady.
Sonymen qatar sottalýshynyń kámeletke tolmaǵan balasynyń bolýyna baılanysty Qazaqstan Respýblıkasy Qylmystyq kodeksiniń 74-baby negizinde jazany óteýdi bir jylǵa keıinge qaldyrýdy usyndy.
Aıta keteıik, Qostanaı turǵyny 30 mln teńgege alaıaqtyq jasaǵany úshin sottaldy.
