800 myń teńge: polıtsııa Pavlodar oblysynda náreste saýdasynyń jolyn kesti
ASTANA. KAZINFORM — Túrkistan oblysynda 23 jastaǵy áıel júktiliginiń sońǵy kezeńinde áleýmettik jeliler arqyly bolashaq sábıin satyp alatyn adamdardy izdegen. Jedel-izdestirý sharalary barysynda polıtsııa qyzmetkerleri onyń bul zańsyz áreketin der kezinde áshkerelep, qylmystyq josparyn tolyq qujattap, kúdiktini ustady. Bul týraly ІІM málim etti.
— Áıel bosanǵannan keıin nebári úsh kúndik náresteni aqshaǵa bermek bolǵan sátinde qolǵa tústi. Polıtsııanyń jedel ári kásibı is-qımylynyń arqasynda sábıge tónýi múmkin aýyr jáne qaıtymsyz qaýiptiń aldyn alý múmkin boldy, — delingen habarlamada.
Atalǵan derek boıynsha qylmystyq is qozǵalyp, kúdikti ýaqytsha ustaý ızolıatoryna qamaldy.
Qazirgi tańda jańa týǵan qyz bala dárigerlerdiń baqylaýynda. Onyń ómiri men densaýlyǵyna eshqandaı qaýip tónip turǵan joq.
Tergeý jumystary jalǵasyp jatyr. Oqıǵanyń barlyq mán-jaıy jan-jaqty tekserilip, zań aıasynda tıisti quqyqtyq baǵa beriledi.
Polıtsııa adam saýdasynyń kez kelgen túri, ásirese balalarǵa qatysty qylmys qatań túrde toqtatylatynyn erekshe atap ótti.
Byltyr adam saýdasyna qatysty 40 qylmys anyqtalǵan bolatyn.
