800 kitap oqyǵan oqýshy: kóp oqýdyń qupııasy nede
ASTANA. KAZINFORM — Qazaqstanda «Kitap oqıtyn ult» respýblıkalyq marafony bastaldy. Oqý mádenıetin qalyptastyrýǵa baǵyttalǵan jobaǵa qazirdiń ózinde 1 mıllıonnan astam adam tirkelgen. Marafonǵa qatysyp jatqan 11-synyp oqýshysy Batyr Bolatbekov osy ýaqytqa deıin 800-den astam kitap oqyǵan.
Marafon 2026 jylǵy qyrkúıekten 2027 jylǵy naýryzǵa deıin jalǵasady. Oǵan oqýshylar men stýdentterden bólek, qoǵamnyń túrli ókilderi qatysa alady. Joba «Kitap oqıtyn mektep», «Kitap oqıtyn kolledj», «Kitap oqıtyn ýnıversıtet», «Kitap oqıtyn pedagog», «Kitap oqıtyn áýlet», «Kitap oqıtyn memlekettik qyzmetshi» jáne «Kitap oqıtyn zııatker» atty jeti baǵytty qamtıdy.
Osy bastamaǵa qatysyp jatqan oqýshylardyń biri — Astanadaǵy № 83 mekteptiń 11-synyp oqýshysy Batyr Bolatbekov. Ol kitap oqýdy 8-synypta bastaǵan.
— Kitap oqýǵa anam túrtki boldy. 8-synypta oqyp júrgen kezimde Astanada jańa kitap dúkeni ashylǵanyn aıtyp, baryp kórýge keńes berdi. Sol jerden mektep baǵdarlamasynda kezdesken shyǵarmalardy qarap júrip, Mirjaqyp Dýlatulynyń «Baqytsyz Jamalyn» jáne Berdibek Soqpaqbaevtyń «Meniń atym Qojasyn» satyp aldym. Buǵan deıin «Meniń atym Qoja» fılmin kórgen edim. Onyń túpnusqasyn, ıaǵnı povesin oqyp kóreıin dedim. Osy shyǵarma meniń kitap oqýǵa degen qushtarlyǵymdy oıatty, — dedi Batyr Bolatbekov Jibek Joly telearnasynyń «Búgin.LIVE» baǵdarlamasynda.
Oqýshynyń aıtýynsha, osydan keıin kitap oqý onyń kúndelikti ómiriniń bir bóligine aınalǵan. Qazir ol mektep baǵdarlamasymen shektelmeı, qazaq jáne álem ádebıetin oqıdy. Kún saıyn kitapqa bir-eki saǵat ýaqyt bólýge tyrysady.
— Qansha jerden sharýam kóbeıip, bosamaı jatsam da, kitap oqý menen qalmaıdy. Kerisinshe, kitap oqý sol sharýalarǵa kúsh beredi, qýat beredi, — deıdi jas oqyrman.
Batyrdyń oqýyna erekshe áser etken shyǵarmalardyń qatarynda qazaq ádebıetiniń týyndylary kóp. Solardyń ishinde Muqaǵalı Maqataevtyń «Raıymbek, Raıymbek!» poemasyn erekshe ataıdy.
Sondaı-aq jas oqyrman Roza Muqanovanyń «Máńgilik bala beıne», Berdibek Soqpaqbaevtyń «Ólgender qaıtyp kelmeıdi», Saıyn Muratbekovtiń «Jabaıy alma» shyǵarmalaryn da erekshe baǵalaıdy. Keıbir kitaptardy birneshe ret, tipti ondaǵan ret qaıta oqyǵan.
— Kitap oqı bergen saıyn oqyrmandyq sana qalyptasady, talǵamyń shyńdalady. Men kitap tańdaǵanda avtoryna, janryna qaraımyn. Kórkem ádebıetti unatamyn. Súbeli dúnıe jazǵan avtorlardyń shyǵarmalaryn oqýǵa tyrysamyn. Áýeli maǵynaly, salmaqty shyǵarmalardy oqyp, óziniń oqyrmandyq sanasyn qalyptastyrǵan durys dep oılaımyn, — deıdi Batyr.
Qazir onyń qolynan túspeıtin kitaptardyń biri — Muqaǵalı Maqataevtyń «Han táńiri» jınaǵy.
Batyrdyń ózi qazaq ádebıetindegi oqyrmandyq negizin qalyptastyrǵanyn aıtyp, endi álem ádebıetine kóbirek kóńil bólgisi keledi. Aldaǵy josparyna Dante Alıgerıdiń «Qudiretti komedııasyn», Ýılıam Shekspırdiń pesalaryn oqý kirip otyr.
— 800 kitappen toqtaýǵa bolmaıdy. Kitap oqý ómirińniń sońyna deıin jalǵasýy kerek. Ol dúnıege degen kózqarasyńdy qalyptastyrady, tanymyńdy keńeıtedi. Qazaq ádebıetinen ózimniń negizimdi qalyptastyrdym dep oılaımyn. Endi álem ádebıetin kóbirek oqyp, odan sýsyndaǵym keledi, — deıdi jas oqyrman.
Mektep kitaphanasynda da shyǵarmalardy talqylap, kitap boıynsha pikir almasatyn kezdesýler turaqty uıymdastyrylady.
— Synyp jetekshim Nurbek Qaıyrǵalıuly meni osyndaı sharalarǵa qatystyryp, jarystarǵa jetelep júr. Oǵan aıryqsha alǵys aıtqym keledi. Biz mektep kitaphanasynda kitaptardy taldap, talqylap turamyz. Ustazymmen de oqyǵan shyǵarmalarym týraly jıi pikirlesemin, — dedi Batyr.
Aıta keteıik, buǵan deıin 800 kitap oqyǵan taǵy bir astanalyq oqýshy jaıly jazǵan edik.
