800-den astam azamat Otbasynyń tsıfrlyq kartasy arqyly MÁSQ-ten áleýmettik tólemder alǵan
ASTANA. KAZINFORM – 2024 jyldyń basynan bastap Otbasynyń tsıfrlyq kartasynyń kómegimen 807 azamat SMS-ke kelisim berý arqyly Memlekettik áleýmettik saqtandyrý qorynan (budan ári – MÁSQ) áleýmettik tólem alý quqyǵyn paıdalandy. Onyń ishinde 775 adam jumysynan aıyrylýy jáne 32 adam bir jarym jasqa deıingi bala kútimi boıynsha tólem aldy. Bul týraly QR Eńbek jáne halyqty áleýmettik qorǵaý mınıstrligi málimdedi.
Otbasynyń tsıfrlyq kartasy (budan ári — OTsK) azamattardyń áleýmettik mártebesine baılanysty kepildi memlekettik qoldaýdyń qandaı da bir túrin alýǵa quqyly ekenin jetkizip otyratyn «elektrondyq jarshy» qyzmetin atqarady.
«Qazirgi ýaqytta OTsK áleýmettik saqtandyrý júıesiniń qatysýshylary bolyp tabylatyn qazaqstandyqtarǵa qandaı da bir ótinishtersiz MÁSQ-ten áleýmettik tólemderdiń mynadaı 3 túrin resimdeýge múmkindik beredi: eńbekke qabilettiliginen aıyrylǵan jaǵdaıda, jumysynan aıyrylǵan jaǵdaıda, asyraýshysynan aıyrylǵan jaǵdaıda tólenetin áleýmettik tólemder», - delingen habarlamada.
Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. SMS alǵan azamat oǵan kelisimi jóninde jaýap berýi kerek. Ótinishti resimdeý jáne áleýmettik tólemdi taǵaıyndaý keıin alýshynyń banktik shotyna aqsha qarajatyn aýdara otyryp, avtomatty rejımde júrgiziletin bolady.
Tólem alýshynyń uıaly telefon nómiri mobıldi azamattar bazasynda tirkelgen jaǵdaıda, áleýmettik tólemder taǵaıyndaý boıynsha qyzmetterdi proaktıvti formatta kórsetýge bolady, ony egov.kz portaly arqyly jasaýǵa bolady.
2023 jyly OTsK kómegimen 17 270 azamatqa MÁSQ-ten áleýmettik tólemder taǵaıyndaldy.
Jalpy, ótken jyly shamamen 1,3 mln qazaqstandyq MÁSQ-ten 750,7 mlrd teńge somasyna áleýmettik tólem aldy.
