80 jyldyqqa – 80 sýret: Tarazda erekshe fotopoezııa kórmesi ótti
TARAZ. QazAqparat – Taraz qalasyndaǵy «Jastar» alleıasynyń «Bilim» alańynda «Móp-móldir kózdiń qarasyn, Tarazdan ǵana tabasyń» atty erekshe foto kórme ótti. Kórmeniń ereksheligi – fotosýret pen poezııa óneriniń ózara úndesip, kelýshilerge ádemi áser syılaǵany boldy, dep habarlaıdy QazAqparat tilshisi.
Kórmede Qazaqstan Jýrnalıster odaǵynyń múshesi, Jambyl oblystyq «Araı» jastar gazetiniń fototilshisi Altynbek Qartabaıdyń foto sýretteri qoıyldy. Taraz qalalyq ákimdiginiń uıymdastyrýymen ótken shara Jambyl oblysynyń 80 jyldyǵyna arnaldy.
Bir qyzyǵy, kórme shymyldyǵy ashyq aspan astyndaǵy klassıkalyq valspen ashyldy. Sodan keıin júrgizýshi ortaǵa shyǵyp, kartınalardyń betperdelerin asha júrip óleń oqydy. Osy sátte óńirdegi «Aqkerbez» bıshiler tobynyń ulttyq naqyshta kıingen arýlary da barlyq kartınalardyń betperdelerin ashyp, olardy kópshilik nazaryna usyndy. Altynbek Qartabaı óziniń tuńǵysh shyǵarmashylyq kórmesin aqyndardyń óleńderimen keremet úılestire bilýimen de erekshelendi deýge bolady. Fototilshi qazaqtyń arý qyzdary, sonymen qatar altyn kúz, aqyndar beınesi, tabıǵat kórinisteri sııaqty kórkem kórinisterdi de qalt jibermegen. Al, bul shyǵarmalar Jaqsylyq Sátibekov, Arǵynbaı Bekbosyn, Tynyshbaı Raqym, Kúlásh Ahmetova, Serik Tomanov, Maraltaı Raıymbekuly sııaqty aqyndardyń óleńderimen jaqsy jarasym taýyp, kórmeni tamashalaýshylarǵa keremet kúı syılady.
Oblysymyzdyń 80 jyldyǵy aıasynda ótken A.Qartabaıdyń fotopoezııa kórmesine kelgenderdiń qarasy kóp boldy. Olardyń arasynan óńirge eńbegi sińgen ardagerlerdi, ǵalymdardy, oqytýshy-professorlardy, túrli teatr, ádebıet, óner, tanymal ánshiler, beıneleý óneriniń bilgirlerin, BAQ ókilderin jáne qarapaıym qala turǵyndaryn, stýdent jastardy kezdestirdik.
Іs-sharany oblys ákiminiń orynbasary Sulýshash Qurmanbekova ashyp, fotoónerdiń ereksheligine, fototilshi Altynbek Qartabaıdyń analar bolmysyn, arýlar obrazyn ashý arqyly qazaq qyzdarynyń izgilikke toly keıpin, sulýlyǵyn tap basyp kórsete bilgenine toqtalyp, sáttilik tiledi.
Kórmeniń ashylý saltanatynda sóılegen sózinde oblys ákiminiń orynbasary Sulýshash Qurmanbekova fotografııa óneri jaıly oı órbitip, A. Qartabaıdyń shyǵarmashylyǵyna toqtalyp ótti.
«Qazaq qyzdarynyń jan-jaqty minezin, beınesin fotosýretpen ashyp, qazaq qyzyna ǵana tán kórkemdikti sińirip kórsetip otyrǵan fotograf Altynbek Qartabaı – erekshe óner ıesi. Oblystyń qarqyndy damýy, óńirdegi ózgerister men jańalyqty sýretine syıdyryp júrgen óner ıesiniń shyǵarmashylyǵy da ózgeshe. Qazaq qyzynyń asyl jar, aıaýly ana obrazyn sýretke basyp, óner keńistigine ózinshe úles qosqan sýretkerdi dúıim jurtqa eńbegin usynǵan qýanyshty kúnimen quttyqtaımyn», – dedi Sulýshash Sátbekqyzy óz sózinde. Kórmeniń lentasy qıylyp, kesh ıesi A. Qartabaı qushaq-qushaq gúlimen qosa bar ystyq yqylasyn, rııasyz balalyq peıilimen qosa anasyna usyndy. Kórmeni tamashalaýǵa oblystyq kásipodaqtar ortalyǵy aýmaqtyq kásipodaqtar birlestiginiń tóraǵasy Meırambek Tólepbergen, Taraz qalasynyń ákimi Qaırat Dosaevtyń arnaıy kelgenin de aıta ketsek, artyq bolmas.
«Bul meniń 15 jyl boıǵy izdenisimniń jemisi. Oblysymyzdyń 80 jyldyǵyna oraı osyndaı fotopoezııa kórmemniń ótip jatqanyna, óńir toıyna tamshydaı úles qosqanyma qýanyshtymyn. Oblys ákimi Asqar Isabekulynyń bastamasymen júzege asqan, búginde kóz súısintip turǵan «Jastar aleıasy»-ndaǵy «Bilim alańyn» tańdaǵanym beker emes. Munda kóbinese jastar men birge jasamystar da júredi. Men kórmege ákelgen týyndylar úlkenge de, kishige de unady degen oıdamyn. Al meniń sýretterim árkimniń ózinshe túsinip, ózinshe qabyldaýymen mańyzdy. Qoldaý bildirgen oblys, qala ákimdikterine, oblystyq «ARAІ» jastar gazetiniń ujymyna, osy kórmege arnaıy kelgen Altynkúl anama, barsha kórermenderime alǵysymdy bildiremin, – dedi Altynbek Qartabaı.
Sondaı-aq, fototilshi týǵan jerdiń, qorshaǵan ortanyń keremet sulýlyǵyn kórmeý múmkin emestigin alǵa tartyp, óz kórmesinde fototýyndylarymen qosa poezııa ónerin biriktirip, aqyndar shyǵarmashylyǵyn da osy keshke arqaý etýdi maqsat etkendigin, ol oıy esh ketpegenin jetkizdi.
