80 jyldyqqa – 80 kitap. «Taraz muralary» kóptomdyǵy jaryq kórdi
TARAZ. QazAqparat – Jambyl oblysynyń 80 jyldyǵyna qaraı ótken saltanatty jıynda «Taraz muralary» tanymdyq-tarıhı kóptomdyqtyń 80 tomynyń tusaýkeser rásimi ótti, dep habarlaıdy QazAqparat.
Oblystyń 80 jyldyq mereıtoıyna arnalǵan aıryqsha jıyn, saltanatty shara «Kóne Taraz» tarıhı-etnomádenı kesheniniń «Kórme» pavılonynyń úlken zalynda ótti. Mereıtoı qarsańynda kópshilikke esigin aıqara ashqan zalda aldymen kórermen nazaryna oblys tarıhy men jetken jetistikteri týraly arnaıy ázirlengen beınefılm usynyldy.
Jıyn barysynda «Taraz muralary» tanymdyq-tarıhı kóptomdyqtyń alǵashqy jaryq kórgen 80 tomynyń tanystyrylymy ótti. Kitap lentasyn tarıh ǵylymdarynyń doktory, professor, QR Ulttyq ǵylymı akademııasynyń qurmetti múshesi Talas Omarbekov pen ataqty abaıtanýshy-ǵalym, fılologııa ǵylymdarynyń doktory, professor Mekemtas Myrzahmetov qıdy.
«Sonaý Túrki qaǵanaty dáýirinen beri qaraı óńir jurty qaıta-qaıta árýaǵyna syıynyp jatqan Áýlıeata, Jambyl babalarymyzdyń eske alynýy Taraz jeriniń rýhanı damyp jatqanynyń kórinisi. Sondyqtan da, biz myna usynyp otyrǵan «Taraz muralary» atty 80 tomdyq kitap osy ustanymdy, osy ıdeıany ary qaraı jalǵastyrýshy. Kez-kelgen damyǵan el óziniń jeke tulǵalarymen, dara tulǵalarymen maqtanady. Eń aldymen rýhanı muralarymen maqtanady. Mysaly, Gollandııa Rembrandtpen, Germanııanyń Bonn degen kishkentaı ǵana qalasy Bethovenimen maqtanady. Ondaı tulǵalar bizde de jetkilikti. Olardyń jetken jetistikteri maqtan etýge ábden laıyqty. Qasıet daryǵan Taraz jerinde de kóptegen talanttar dúnıege kelip, ósip-óngen jer. Olardyń ishinde jazýshylar, aqyndar, jýrnalıster, óner qaıratkerleri, ǵalymdar kóptep kezdesedi. Olar tek respýblıka kólemine ǵana emes, dúnıe júzine máshhúr. Mine, osyny eskere otyryp, rýhanı muralarymyzdy urpaqtan-urpaqqa jalǵastyryp otyrýymyz kerek. Búgin tusaýyn kesken, 80 tomnan turatyn kitaptyń mıssııasy da sol», – dedi professor Talas Omarbekov.
Sondaı-aq, 80 tomdyqty arnaıy QR Ǵylymı kitaphanasyna, QR Prezıdenti kitaphanasyna tapsyratynyn aıtqyp, jıynǵa qatysqan QR Mádenıet jáne sport mınıstri Aqtoty Raıymqulovaǵa saltanatty túrde jınaq-kitapty tabys etti. Aıta keteıik, bul kóptomdyqty shyǵarý jumystary aldaǵy ýaqytta da óz jalǵasyn tappaq.
Óz kezeginde QR Mádenıet jáne sport mınıstri Aqtoty Raıymqulova jambyldyqtardy osynaý aıtýly merekemen quttyqtap, QR Premer-Mınıstri, Úkimet basshysy Asqar Mamınniń júrekjardy quttyqtaý hatyn oqyp, ony oblys ákimi Asqar Myrzahmetovke saltanatty túrde tabys etti.
«Qadirmendi oblys turǵyndary! Sizderdi Jambyl oblysynyń 80 jyldyq mereıtoıymen shyn júrekten quttyqtaımyn. Qazaqstan respýblıkasynyń Tuńǵysh Prezıdenti, Elbasy N.Á.Nazarbaev: «Bul ólke bir kezderi qudyretti Qarahan memleketi saltanat qurǵan, Qazaq handyǵy irge kóterip, týyn tikken jer. 100 jasaǵan Jambyl atamyzdyń atyn ıemdengen ejelgi Áýlıeata jeri altyn qursaqty óńir. Kúmis kómeı ánshiler men dáýlesker kúıshiler, bilikti bıler men bilekti batyrlar ótken aımaq» dep erekshe atap ótken bolatyn. Memleket basshysy Qasym-Jomart Toqaev Jambyl oblysynyń damýyna úlken mán beredi. Qazirgi tańda elimizdiń ekonomıkasyn damytýǵa, mádenıeti men rýhanııatyn baıytýǵa óńirdiń qosyp otyrǵan úlesi aıryqsha.
Jambyl oblysy – hımııa ónerkásibiniń flagmany, balamaly energııa kózderin óndiriske alǵash engizgen óńir. Munda halyqtyń turmys-sanasyn arttyrýǵa baǵyttalǵan jańa bastamalar, pılottyq jobalar iske asyrylýda. Oblys mereıtoıy aıasynda búgin osy óńirdiń áleýmettik-ekonomıkalyq damýy men urpaqqa úlgi bolar tereń tarıhyna kýá bolyp otyrmyz. jańadan ashylǵan «Tekturmas» etno-tarıhı, «ShAHRISTAN» etno-mádenı keshenderi, Áýlıeataǵa, Kenen Ázirbaevqa, Asqar Toqpanovqa arnalǵan eskertkishter men oblystyq ólketaný mýzeıi, rýhanııat jáne tarıhtaný ortalyǵy, sheberler týrızm ortalyǵy, kórkemsýret galereıasy, saǵat stellasy sııaqty shyǵys sáýlet úlgisindegi ǵımarattar taǵylymy mol tarıhty tanýǵa, óńir mádenıeti men dástúrin jańǵyrtýǵa, týrızmdi damytýǵa aıtarlyqtaı úles qosady dep senemin. Birligi men tirligi jarasqan mereıli ólkeniń torqaly toıy qutty bolsyn. Barshańyzǵa baq-bereke, otbasylaryńyzǵa amandyq tileımin», delingen quttyqtaý hatta.
Kelesi kezekte óńir basshysy Asqar Myrzahmetov «Jambyl oblysyna sińirgen eńbegi úshin» tósbelgisimen birqatar azamattardy marapattady. Olardyń qatarynda KSRO jáne Qazaqstannyń halyq ártisi, KSRO jáne Qazaqstannyń Memlekettik syılyǵynyń laýreaty, Qazaqstannyń Eńbek Eri Asanáli Áshimov, tarıh ǵylymdarynyń doktory, professor Mámbet Qoıgeldıev, fılologııa ǵylymdarynyń doktory, professor Mekemtas Myrzahmetov, Qazaqstannyń halyq artısi, teatr jáne kıno ártisi Gúljan Áspetova, Qazaqstannyń jáne Qyrǵyz respýblıkasynyń halyq artısi, QR Memlekettik syılyǵynyń laýreaty Altynbek Qorazbaev, grek-rım kúresinen Olımpıada oıyndarynyń chempıony, Álem chempıony Jaqsylyq Úshkempirov, QR Ulttyq ǵylym akademııasynyń qurmetti múshesi Talas Omarbekov, Qazaqstannyń halyq ártisi, QR Memlekettik syılyǵynyń laýreaty Tuńǵyshbaı Jamanqulov, QR Eńbek sińirgen ártisi, ánshi Baǵdat Sámıdınova, Qazaqstannyń Eńbek sińirgen qaıratkeri, kompozıtor, «Dos Muqasan» ansambliniń negizin qalaýshy Murat Qusaıynov, satırık-jazýshy Tolymbek Álimbekuly, fılologııa ǵylymdarynyń doktory, professor, Qazaqstan Jazýshylar odaǵynyń múshesi Janǵara Dádebaev, bokstan Olımpıada oıyndarynyń qola júldegeri, Olımpıada oıyndarynyń chempıony Ermahan Ibraımov bar. Jıyn sońy oblystyq mádenıet salasy qyzmetkerleriniń daıyndaǵan kontserttik baǵdarlamasyna ulasty.
