80 jyldan keıin aq aıýlar jer betinen joıylyp ketýi múmkin
NUR-SULTAN. QazAqparat – Arktıkada muz jamylǵysynyń erýinen polıar aıýlary osy ǵasyrdyń sońynda joıylyp ketýi múmkin, dep habarlaıdy QazAqparat Euronews-ke silteme jasap.
Qazirdiń ózinde jyrtqyshtar ashtan ólýde, óıtkeni olardyń tabıǵı tirshilik etý ortasy buzylǵan. Ǵalymdardyń pikirinshe, eger atmosferada kómirqyshqyl gazynyń shyǵaryndylary qazirgi deńgeıde saqtalsa, onda jahandyq jylyný polıar aıýlary úshin qaıǵyly saldarǵa ákelýi múmkin.
Arktıkadaǵy klımattyń ózgerýi búginde planetanyń basqa aımaqtarymen salystyrǵanda eki ese jyldam júrip jatyr. Polıar aıýlary shamamen 200 kún ash júre alady. Biraq olarǵa qoregin tabý qıynǵa soǵýda.
Olar muzda ómir súretin arktıkalyq ıtbalyqtardy aýlaıdy. Eger janýardyń dene salmaǵy normadan 20% az bolsa, onda ol qoreksiz 200 kún emes, tek 125 kún ómir súre alady.
Nature Climate Change ǵylymı jýrnalynda jarııalanǵan zertteýde eger jyrtqyshtardyń tirshilik etý ortasyna antropogendik áser toqtamasa, klımat týraly Parıj kelisiminiń maqsattarynyń jetistigi de polıar aıýlaryn joıylyp ketýden saqtaı almaıtyny aıtylǵan.
