80 jastaǵy aqsaqal prokýrordyń kóligin órtedi degen kúdikke ilindi
AQTÓBE. QazAqparat - Aqtóbe oblysy Hromtaý qalasynyń turǵyny Qadyrjan Saldyqbaev 80 jasynda alǵash ret polıtsııa qyzmetkerine túsinikteme berdi. Oblystyq Іshki ister departamentiniń tergeýshileri Hromtaý aýdandyq prokýrorynyń kóligi órtenýine baılanysty birer aı buryn sottalyp ketken polıtsııa qyzmetkerleriniń ata-analarynan túsinikteme alǵan, dep habarlaıdy QazAqparat tilshisi.
«Nemerem Syrym Qadyrjanov Hromtaý aýdandyq ishki ister bóliminde jumys istep, ótken jyldyń sońynda «kúdiktige kúshtep aıybyn moıyndatty, urdy, dene jaraqatyn saldy» degen aıyppen úsh jylǵa bas bostandyǵynan aıyryldy. Ol úsh jyl boıy memlekettik, quqyq qorǵaý salasynda jumys isteı almaıdy. Sodan keıin aýdandyq prokýrordyń kóligi órtenip, ol iske bizdiń qatysymyz bar degen kúdikpen túsinikteme alyndy. Oblystyq ishki ister departamentinen kelgen tergeýshi «mashınany kórdiń be, qandaı kólik, qalaı órtengen» degen suraqtardy qoıdy. Úıde otyrǵan shal-kempirge ol nege kerek? Menen, úıdegi kelinimnen túsinikteme aldy»,- deıdi Qadyrjan Saldyqbaev.
Aýdan ortalyǵynda turatyn aqsaqaldy qoldaýǵa búgin túrmege qamalǵan Batyrbek Bahradınovtyń týysy Nurjan Óksikbaev ta keldi. Ol prokýror kóliginiń órtenýine aqsaqaldyń esh qatysy joq dep otyr.
«Kóliktiń órtengenin estigen kezde bári ań-tań boldy. Al 80 jastan asqan aqsaqaldan túsinikteme alǵanda esimizdi jııa almaı qaldyq. Bul kimniń oıyna kelip júrgen is ekenin bilmeımiz. Olarǵa ne kerek? Ósh alý ma bul?» - deıdi Nurjan Óksikbaev.
Kúdikke ilikken Qadyrjan Saldyqbaev istiń sońy nemen aıaqtalatynyn bilmeı otyr. «Qoryqqanda qaıda baryp tyǵylamyn? Sottasa, otyryp shyǵamyn», - dedi ol.
