80 jastaǵy zeınetker 8 balasynan alıment talap etip, sotqa júgindi
ASTANA. KAZINFORM — Atyraýlyq 80 jastaǵy zeınetker 8 balasy men 1 nemeresinen ózin asyrap-baǵý úshin olardan alıment tóleýdi talap etip, sotqa shaǵym túsirgen, dep habarlaıdy oblystyq sottyń baspasóz qyzmeti.
Shaǵymynda zeınetker 10 jyldan astam ýaqyt jalǵyz turatynyn kórsetken. Týystarynyń ishinde bir uly ǵana habarlasyp tursa, qalǵan balalary men nemeresi eshqandaı materıaldyq, moraldyq qoldaý kórsetpegen.
Zeınetkerdiń aıtýynsha, densaýlyǵy men materıaldyq jaǵdaıynyń nasharlaýyna baılanysty ol týystarynyń kómegine zárý.
«Neke (erli-zaıyptylyq) jáne otbasy týraly» Kodekstiń 145-babynyń 1-tarmaǵyna sáıkes kámeletke tolǵan eńbekke qabiletti balalar kómekke muqtaj eńbekke jaramsyz ata-analaryn asyraýǵa jáne olarǵa qamqorlyq jasaýǵa mindetti.
Kodekstiń 153-babyna sáıkes, kómekke muqtaj eńbekke jaramsyz atalar men ájeler ózderiniń kámeletke tolǵan eńbekke qabiletti balalarynan nemese jubaıynan (burynǵy jubaıynan) alıment alý múmkin bolmaǵan jaǵdaıda, eńbekke qabiletti kámeletke tolǵan nemerelerinen alıment alýdy sot tártibimen talap etýge quqyly.
— Atyraý qalalyq soty taraptardyń árqaısysynyń materıaldyq jáne otbasylyq jaǵdaıyna taldaý jasap, talap qoıýshynyń talaptary ishinara qanaǵattandyrýǵa jatady degen qorytyndyǵa keldi. Sot zeınetkerdiń tamaǵy men dári-dármegi úshin 8 balasy men nemeresiniń árqaısysynan 3 AEK mólsherinde alıment óndirdi. Sot sheshimi zańdy kúshine engen joq, — delingen habarlamada.
Osyǵan deıin sot oryndaýshylar jarty jylda 18 mlrd teńgeden astam alıment óndirgeni aıtyldy.