80 jastaǵy astanalyq marafonshy jaraqatyna qaramastan Keıptaýnda márege jetti
ASTANA. KAZINFORM — Ońtústik Afrıka astanasy Keıptaýnda ótken halyqaralyq marafonda baq synap, jaraqat alsa da, 42 shaqyrymdyq qashyqtyqty sońyna deıin baǵyndyrǵan 80 jastaǵy astanalyq sport ardageri Saltanat Túıtebaev elge oraldy.
26 mamyr kúni keshke Nursultan Nazarbaev halyqaralyq áýejaıynda sportshyny qarsy alýǵa jınalǵandardyń qarasy qalyń. Jaqyndary, sport qaýymdastyǵy men buqaralyq aqparat quraldarynyń ókilderi ardagerge gúl shoqtaryn usynyp, onyń qajymas qaıratyna, sportqa degen adaldyǵyna tánti bolǵandaryn jetkizdi.
Ardager sportshy júgirý jolynyń 11-shaqyrymynda aıaǵyn jaraqattap alǵanyn aıtyp, doda kezindegi qıyndyqtar týraly aıtyp berdi.
— Júgirý jolynyń 11-shaqyrymynda aıaǵymdy jaraqattap aldym. Soǵan qaramastan, boıdaǵy bar kúshimdi salyp, márege jetýdi kózdedim. Álem boıynsha «80 jastan joǵary» sanatta nebary 10 adam jınalǵan eken. Bastaǵan isti shala qaldyrýǵa bolmaıtyndyqtan, qalaı da sońyna deıin jetý men úshin namys edi. Eriktilerge «eger ózdigimnen júre almaı qalsam ǵana meni joldan alyp ketińizder, áıtpese toqtamaımyn» — dep eskerttim, — deıdi marafonshy.
Keıptaýndaǵy halyqaralyq marafonda astanalyq qarııa álemniń túkpir-túkpirinen kelgen myqtylarmen ıyq tirese júgirip, 42,2 shaqyrymdyq klassıkalyq qashyqtyqty tolyq júrip ótti. Jarys ortasynda alǵan jaraqaty bolsa da, jeńiske degen umtylysynyń arqasynda máre syzyǵyn qıdy.
Bul Saltanat Túıtebaevtyń halyqaralyq deńgeıdegi alǵashqy iri jetistigi emes. Ol 2025 jyly Nıý-Iork marafonynda 80–89 jas aralyǵyndaǵy jelaıaqtar arasynda 4 saǵat 45 mınýttyq nátıjemen bas júldeni ıelengen. Al oǵan deıin 2021 jyly 75–79 jas sanatynda kúmis júldeger atanǵan.
Marafonshynyń aıtýynsha, jas ereksheligi alǵa umtylýǵa eshqashan kedergi bolmaýy tıis. Al halyqaralyq jarystarǵa qatysý — ol úshin ózin taǵy bir synap kórýdiń jáne óskeleń urpaqqa úlgi kórsetýdiń taptyrmas múmkindigi.
Aıta keteıik, buǵan deıin, London marafonynda bir jarysta úsh sportshy álem rekordyn jańartqanyn habarlaǵan edik.
