80 jasynda 42 shaqyrymdy júgirip ótti: Nıý-Iork marafonyna qatysqan aqsaqal elge oraldy
ASTANA. KAZINFORM – Astana halyqaralyq áýejaıynda 5 qarashaǵa aýǵan túni júgirýden Nıý-Iork marafonynda 80-89 jas sanatynda chempıon atanǵan Saltanat Túıtebaev elge oraldy. Bul týraly elorda ákimdiginiń resmı saıty habarlady.
Kópke úlgi, júgirýdi kúndelikti ádetine aınaldyrǵan atamyzdy Astana qalasynyń Dene shynyqtyrý jáne sport basqarmasy basshysynyń orynbasary Azamat Aǵzamov, týǵan-týystary qushaq jaıa qarsy aldy.
— Álemde eń bedeldi sanalatyn 6 marafon bar. Olar London, Boston, Berlın, Chıkago, Nıý-Iork jáne Tokıo qalalarynda ótedi. Bul básekege tek jarna tólep qana qatysa almaısyń. Arnaıy ýaqyt normatıvin oryndaýǵa tıissiń. Men Amsterdamdaǵy trassada belgili bir ýaqyt kórsetkishin tirkep, Nıý-Iork marafonyna qatysýǵa ótinish jibergenmin. Bıyl 200 myń úmitker arasynan shaqyrtý aldym. Óz kareramda ekinshi márte Nıý-Iork marafonynda júgirý baqyty buıyrdy, — dedi Saltanat Túıtebaev.
80 jastaǵy atamyz buǵan deıin 2021 jyly da Nıý-Iork marafonyna qatysyp, 75-79 jas sanatynda kúmis júlde alǵan edi. Mine, araǵa 4 jyl salyp, ol 42,2 shaqyrymdy 4 saǵat 45 mınýt 56 sekýndta júgirip ótti. Osy nátıjeniń arqasynda atamyz 80-89 jas sanatynda top jardy.
— 2021 jyly álemde pandemııa bolǵanyqtan, Nıý-Iork marafonyna 30 myńdaı adamǵa qatysýǵa ruqsat berilip edi. Osy joly 55 myń adam bir mezette júgirdi. Olımpıada jáne álem chempıondarymen, rekordsmendermen birge júgirý — úlken mártebe. Trassa óte aýyr bolsa da, jol boıy 2 mln-nan astam jankúıer qyzý qoldady, — dep Saltanat Túıtebaev atamyz bıylǵy jarystyń ereksheligin atap ótti.
Jalpy 2025 jylǵy Nıý-Iork marafonynda Qazaqstan atynan 44 sportshy qatysty.
Al New York Marathon júgirisinde eń egde qatysýshy bolyp Japonııadan barǵan Koıchı Kıtabatake tanyldy. 91 jastaǵy qatysýshy marafon qashyqtyǵyn 7 saǵat 25 mınýt 13 sekýndta eńsergen.