80 myńǵa jýyq adam Marsqa kóshýge ótinish berdi
ASTANA. 12 mamyr. QazAqparat - Álemniń 120 elinen 78 myńǵa tarta adam nıderlandtyq Mars One kommertsııalyq emes uıymy uıymdastyrǵan Marsqa kóshý jónindegi baǵdarlamaǵa qatysýǵa tilek bildirdi, dep jazady Forbs.rý.
Tilek bildirýshilerdiń basym bóligi - AQSh turǵyndary (17 324 adam). Odan keıin - Qytaı (10 241) men Ulybrıtanııa (3 581) tur. Alǵashqy ondyqqa sondaı-aq Reseı, Meksıka, Brazılııa, Kanada, Kolýmbııa, Argentına jáne Úndistan turǵyndary kirdi.
Ótinish qabyldaý 22 sáýirde bastaldy. Ótinishter 31 tamyzǵa deıin qabyldanady. Mars One kompanııasynyń atqarýshy dırektory jáne negizin qalaýshylardyń biri Bes Lensdorp oǵan deıin kompanııaǵa 500 myńǵa deıin ótinim túsedi dep málim etti.
Baǵdarlama sharty boıynsha, 2023 jyly Mars One Qyzyl ǵalamsharǵa tórt jeńimpazdy túsirmek. Kompanııanyń qonystanýshylarǵa jumsaıtyn shyǵyny 6 mıllıard dollardy quraıdy. Odan keıin uıymdastyrýshylar Marstaǵy kolonııany keńeıtý úshin árbir eki jylda jańa astronavtardy attandyrmaqshy. Shyǵyndardy kompanııa kolonııa ómir súre bastaǵan alǵashqy jyldardaǵy realıtı-shoýdan túsetin kirispen qaıtarýǵa úmitti. Aktsııaǵa qatysýshynyń jasy 18-ge tolǵan bolýy tıis. Ótinim berý úshin kompanııa saıtyna bir mınýttik beınerolık ornalastyryp, óziniń Marsqa barý tilegi jóninde áńgimeleýi, sondaı-aq 5-ten 75 dollarǵa deıin qatysýshynyń ál-aýqatyna qaraı jarna tóleýi qajet.
