80 mln teńge jymqyrdy dep aıyptalǵan qazaqstandyq Aýǵanstannan ekstradıtsııalandy

ASTANA. QazAqparat - Aýǵanstan Islam Respýblıkasynyń quzyretti organdary Qazaqstan Bas prokýratýrasynyń qylmystyq jaýapkershilikke tartý úshin Sh. esimdi azamatyn ustap berý týraly suraý salýyn qanaǵattandyrdy, dep habarlaıdy QR Bas prokýratýrasynyń baspasóz qyzmeti.

«Ol, 2014-2015 jyldary Aqtaý qalasynda JShS-lardyń biriniń dırektory bola tura, aldaý men senimdi teris paıdalaný arqyly 11 jábirlenýshiniń 80 mıllıon teńge kólemindegi aqshalaı qarajatyn urlaǵan. Ol jábirlenýshilermen jańa avtokólikter jetkizilimi týraly kelisimder jasasqan jáne aldyn ala tólem alyp, Qazaqstannan ketip qalǵan», - delingen habarlamada.

Ol 2015 jyldan bastap Mańǵystaý oblystyq ІІD-men izdeýde bolǵan jáne nátıjesinde Aýǵanstan aýmaǵynda quqyq qorǵaý organdary ustaǵan.

Búgin QR Ulttyq qaýipsizdik komıtetiniń kómegimen ol Qazaqstanǵa ekstradıtsııalanyp, Almaty qalasy boıynsha ýaqytsha ustaý mekemesine jiberilgen.