80-di alqymdaǵan kompozıtor Іlııa Jaqanov án keshin ótkizdi
ASTANA. QazAqparat - Atyraýda kompozıtor, jazýshy Іlııa Jaqanovtyń "Edil-Jaıyq" atty án keshi ótti.
Keshti Atyraý oblysynyń turǵyndarymen jáne qonaqtarymen qatar aımaq basshysy Nurlan Noǵaev ta tamashalady. Merekelik kontsertke, sonymen qatar aqyn Maraltaı Raıymbekuly men Aqushtap Baqtygereeva, qurmetti temirjolshy Amangeldi Selbaev pen belgili zańger Beket Turǵaraev ta keldi, dep habarlaıdy QazAqparat óńir ákimdiginiń baspasóz qyzmetine silteme jasap.
Kontsertte kompozıtordyń "Sol bir án", "Túngi Serenada", "Tolaǵaı", "Áselim" syndy ánderi shyrqalyp, kórermenniń kóńilin jibitti.
"Óner adamdarynyń eńbegin tonnamen, kelimen, metrmen ólsheýge bolmaıdy. Olardyń jumysyn eldegi beıbitshilik pen qoǵamdaǵy tazalyqtan baıqaımyz", - dedi án keshinde sóz alǵan aımaq basshysy Nurlan Noǵaev.
Oblys ákimi kompozıtor Іlııa Jaqanovty bıylǵy 80 jyldyq mereıtoıymen quttyqtaı otyryp, Elbasy atynan «Qazaqstan Respýblıkasynyń Táýelsizdigine 25 jyl» merekelik medalin tabystady.
Іlııa Jaqanov - kompozıtor, jazýshy, pýblıtsıst, mýzykatanýshy, Qazaqstan men Qyrǵyzstannyń eńbek sińirgen mádenıet qaıratkeri. "Birjan sal", "Aqan seri", "Úkili Ybyraı", "Estaı ánshi" syndy zertteý eńbekteriniń, "Yqylas" romanynyń, "Qaıta oralǵan án", "Qosh bol, vals" povesteriniń, halyq arasynda keń taralǵan "Áselim ánim", "Danııardyń áni", "Aqqaıyń", "Jaılaýkól keshteri" ánderiniń avtory. 
