«80-100 paıyzǵa jetemiz» - mınıstr qantpen ishki qamtý jaıly sensatsııalyq boljam aıtty

ASTANA. KAZINFORM –  Elimizde qantpen ishki qamtý 80-100 paıyzǵa jetkiziledi. Bul týraly QR Aýyl sharýashylyǵy mınıstri Aıdarbek Saparov aıtty.

— Buryn qant qyzylshasynan 10 paıyzǵa jýyq (elimizdegi ishki suranystyń – red.) qant óndiretinbiz. Byltyr qant qyzylshasynyń shyǵymy rekordtyq kórsetkish kórsetip, 1,3 mln tonnaǵa jetti. Qazir 21 paıyzǵa qantty (taǵy da ishki suranystyń kólemin aıtyp otyr – red.) ózimiz óndirip otyrmyz, 128 myń tonna qant shyǵaryldy. Jalpy bizde zaýyttar eski. Tórt zaýytymyz bar. Úsheýi qant qyzylshasyn, bireýi qant quraǵymen jumys isteıdi. Úsheýiniń bıyl júktemesi óte aýyr boldy. Shynyn aıtý kerek, qant qyzylshasynyń shyǵymy sonshalyqty bolady dep eshkim oılaǵan joq. Kezinde sharýashylyqtar «sonshama qant qyzylshasyn shyǵarmaıdy» dep aıtýshy edi. Úkimet bólgen qarajattyń, tehnologııanyń arqasynda osynshama ónim shyqty, — dedi ol Úkimet otyrysynan keıingi baspasóz máslıhatynda.

Sondaı-aq mınıstr elimizde arab ınvestorlary qant óndiretin zaýyt salǵaly jatqanyn aıtty.

— Keshe ǵana arabtarmen kelisimge qol qoıyldy. Olar qant qyzylshasy zaýytyn salamyz dep otyr. Sol zaýyt salynyp, odan basqa tórt zaýytty rekonstrýktsııalap, ónim shyǵarýdy keńeıtsek, qoldaý bolady, - dedi Aıdarbek Saparov.

Sóz sońynda AShM basshysy elimizdegi 4 zaýyt jóndelip bolǵasyn jáne jańa qant zaýyty salynǵan soń ishki qamtý 80-100 paıyzǵa jetetinin atap ótti.

Osyǵan deıin elde alǵash ret tyńaıtqysh qoldaný kórsetkishi 1,9 mln tonnaǵa jetkiziletini týraly jazdyq.