8 jyl buryn Almatydaǵy úıinen qashyp ketken qyz tabyldy
ASTANA. QazAqparat- Astanalyq polıtseıler segiz jyl buryn Almaty qalasyndaǵy úıinen qashyp ketken qyzdy tapty.
Іshki ister departamentiniń baspasóz qyzmeti habarlaǵandaı, qyz quqyq qorǵaýshylardyń nazaryna ózimen birge eshbir qujaty bolmaǵandyqtan iligipti. Sonymen birge onyń naqty turatyn jeri de bolmaı shyqty.
Jeke basynyń kim ekendigi anyqtalǵansha ol ishki ister bóliminiń arnaıy bólmesinde ýaqytsha ornalastyryldy.
Polıtseıler keıin anyqtaǵandaı, onyń týý týraly kýáligi joǵalǵan, al jeke kýálik alýǵa eshbir qujat tapsyrmaǵan bolyp shyqty.
Quqyq qorǵaýshylarǵa boıjetken ózin Ekaterına Boıkomyn dep tanystyrǵan. Іzdestirý sharalarynyń nátıjesinde polıtseıler onyń 1994 jyly týylǵan Almaty qalasynyń turǵyny Ekaterına Kohanova ekenin anyqtady.
Jaýap alý kezinde boıjetken óziniń týǵan anasyn eshqashan kórmegenin aıtty. Toǵyz jasqa deıin ony ákesi Ivan Boıko men ógeı sheshesi tárbıelepti. Qyzdyń anasymen ajyrasqannan keıin ákesi ony Almaty oblysy Talǵar qalasyndaǵy ınternatqa beredi. Internattan qashyp úıine kelgen qyz ákesiniń basqa áıelmen turyp jatqanyn kóredi. Áke tarapynan qoldaý tappaǵan ol úıinen qashady.
Polıtseıler Almatydan qyzdyń ákesin izdep tapty. Ákesi Ekaterınanyń óz qyzy ekenin, birneshe jyl buryn úıden qashyp ketkenin jetkizdi. Ótken demalys kúnderi Astanaǵa kelip qyzyn alyp qaıtty.
