8 jyl úzilisten keıin qalypqa kelý ońaı boldy – bokstan Qazaqstan chempıony
ASTANA. KAZINFORM – Áıgerim Sáttibaeva bokstan 48 keli salmaq dárejesinde Qazaqstan chempıony atandy. 5 balanyń anasy 8 jylǵa sozylǵan dekrettik demalysynan keıin boksqa qaıta oralǵan.
– Jarys joǵary deńgeıde, tartysty ótti. Jeke ómir men sportty qatar alyp júrý ońaı emes. Óıtkeni kópbalaly ana bolǵannan keıin balalaryma da kóńil bólip, jattyǵýlarymdy da ýaqytyly isteý kerek. Biraq joldasym janymda qoldap júredi. Men joq kezde joldasym balalarmen qalady, – deıdi ol “Búgin LIVE” baǵdarlamasyna bergen suhbatynda.
Áıgerim Sáttibaeva 8 jyl dekrettik demalysta bolsa da qalypqa kelý ońaı bolǵanyn aıtady.
– Men 8 jyl dekrette otyrdym. Ol kezde jattyǵýlarymdy, rıngti qatty saǵynatynmyn. Qaıta oralýǵa sol saǵynyshym áser etti. Boksqa kelgennen keıin fızıkalyq jáne tehnıkalyq turǵyda ózimdi qalypqa keltirý jeńil boldy. Onyń aldynda da tájirıbem bar edi. Joldasym da, jeke bapkerim de jan-jaqty kómektesti, – deıdi boksshy.
Aıta keteıik, kúni keshe Semeıde bokstan Qazaqstan chempıonatynyń fınaldyq jekpe-jekteri ótken edi.