8 jeltoqsanda Astanada «Qazaqstan arýy - 2012» baıqaýynyń fınaly bolady
ASTANA. 5 jeltoqsan. QazAqparat - 8 jeltoqsanda Astanadaǵy Táýelsizdik saraıynda «Maqsat jolyndaǵy sulýlyq» taqyrybymen «Qazaqstan arýy - 2012» baıqaýynyń aqtyq saıysy ótedi. Bul týraly búgin baspasóz-máslıhatynda uıymdastyrýshylar málimdedi.
Baıqaýdyń prezıdenti Alena Rıvlınanyń aıtýynsha, bul ulttyq jobany ótkizý bıyl túbirimen ózgergen. «Eger de buryn bul konkýrs sahnada, kontsert sııaqty ótkizilip kelgen bolsa, bıyl biz uzyndyǵy 20, eni 5 metrlik úlken podıým jasaımyz. Barlyq saıys sonda ótkiziletin bolady. Bul kontserttik baǵdarlamaǵa kórermenderdiń ózi aralastyrylady», - dedi ol.
Sonymen qatar, uıymdastyrýshylar bıyldan bastap saıysqa óz kóılekterin usynǵan dızaınerlerge arnaıy syılyqtar bermek. «Eń úzdik kóılekke arnaıy júlde beriledi. Bul dızaınerlerge úlken talpynys bolmaq. Kimniń kóılegi úzdik dep tanylsa, kelesi jyly ol qazylar alqasynyń quramyna kiredi», - dep túsindirdi ol.
Bıylǵy sulýlyq saıysyna Astanadan 7 arý qatysqaly otyr. A. Rıvlına ony elordanyń konkýrsty qabyldaýshy qala ekendigimen baılanystyrdy. Al Almaty eki arýyn úkilep qosyp otyr, qalǵan oblys ortalyqtarynan bir-bir boıjetken óz qalasynyń abyroıyn qorǵamaq.
Arýlardyń saıysyna qazylyq etý Astana qalasy ákimdiginiń mádenıet basqarmasynyń bastyǵy Bolat Majaǵulov, belgili mýzykant Marat Bısenǵalıev, rejısser Farhat Sháripov, dızaıner ári akter Bópesh Jandaev jáne basqa da belgili azamattarǵa tapsyrylyp otyr. Ulttyq saıystyń feshn-konsýltanty belgili qazaqstandyq feshn-prodıýsser Sáken Jaqsybaev.
Sharanyń júrgizýshileri retinde Qazaqstan televızııasynyń jarqyn juldyzdary Dınara Sátjan men Arnur Ystybaev belgilenip otyr.
