8 jasar qazaq balasy Nıý-Iorkte ótken týrnırde jeńimpaz atandy
ASTANA. QazAqparat - Qazaqtyń qarshadaı balasy tennısten Nıý-Iorkte ótken halyqaralyq týrnırde jeńimpaz atandy. 8 jasar Jaqas Qozybaqtyń oınaý mánerin mamandar belgili tennısshilerge uqsatyp úlgerdi, dep habarlaıdy «Habar» arnasy.
Bir kezderi dál osy kortta belgili tennısshi Endı Roddık úlken sporttaǵy jolyn bastaǵan edi. Al qazir bul jerde jyl saıyn jas tennısshiler arasyndaǵy «Little Mo» týrnıri ótedi. Sońǵy ótken saıysta 8 jasar qyzylordalyq sportshy Jaqas Qozybaq erekshe kózge tústi. Osyǵan deıin AQSh-tyń Florıda shtatynda ótken dodada top jarǵan qazaqtyń qarshadaı balasy Nıý-Iorkte de eshkimge ese jibermedi. -Tennısten asatyn sport túri joq dep oılaımyn. Men qarsylastarymnyń barlyǵyn 6-0 esebimen jeńemin. Eseıgen soń «Úlken dýlyǵa» týrnırlerin utyp alǵym keledi. Men tennısti ata-anamdy, Qazaqstandy jáne álemdi qýantý úshin oınaımyn, - deıdi tennısten halyqaralyq týrnırdiń jeńimpazy atanǵan Jaqas Qozybaq. Qazaq balasy kózge túsken jarys úlken tennıstegi iri týrnır «US Open»-men qatar ótti. Uıymdastyrýshylar muny jaqsylyqqa balap, jastardyń bolashaǵyna úlken úmit artty.
