8 tamyz kúni Qazaqstannyń basym óńirinde ótkinshi jańbyrlar jaýyp, naızaǵaı oınaıdy
ASTANA. 8 tamyz. QazAqparat - Qazaqstan Respýblıkasy Qorshaǵan ortany qorǵaý mınıstrligi «Qazgıdromet» RMK-nyń málimetterinshe,
8 tamyzda respýblıkanyń kóptegen oblystarynda frontaldyq bólikterdiń ótýimen baılanysty, keıbir jerlerde ótkinshi jańbyrlar jaýady, naızaǵaı oınap, jel kúsheıedi.
Qazaqstannyń batysynda ǵana jaýyn-shashynsyz aýa raıy kútilýde.
Aqmola, Pavlodar oblystarynda, kúndiz Ońtústik Qazaqstan, Qyzylorda oblystarynyń keıbir jerlerinde 15-20 m/s jyldamdyqpen jel soǵady, Qyzylorda oblysynda shańdy daýyl kútilýde.
Ońtústik Qazaqstan, Qyzylorda, Atyraý, Aqtóbe oblystarynda kúndiz kún qatty ysıdy. Almaty, Mańǵystaý, Batys Qazaqstan oblystarynda, Qaraǵandy oblysynyń keıbir jerlerinde kúndiz kún qatty ystyq bolady. Atyraý oblysynda, Batys Qazaqstan, Aqtóbe, Qyzylorda, Ońtústik Qazaqstan, Jambyl, Almaty, Pavlodar, Shyǵys Qazaqstan oblystarynda tótenshe joǵary órt qaýpi saqtalady.
Jaqyn táýlikterde respýblıkanyń ońtústik, ońtústik-shyǵys jáne shyǵysyndaǵy taýly ózenderde sý deńgeıleriniń aýytqýlary kútilýde.
