8 shilde — Qazaqstan Qarýly Kúshteriniń áskerı medıtsınasy kúni
ASTANA. KAZINFORM — 1992 jylǵy 8 shildede Qarýly Kúshter Bas shtabynyń Áskerı-medıtsınalyq basqarmasy quryldy. Bul kún táýelsiz Qazaqstannyń áskerı medıtsına júıesiniń qalyptasýy men damýynyń bastaýyna aınaldy, dep habarlaıdy Qorǵanys mınıstrliginiń baspasóz qyzmeti.
Búginde áskerı-medıtsınalyq qyzmet mamandary áskerlerdiń jaýyngerlik daıarlyǵyn, oqý-jattyǵýlardy, jumyldyrý jıyndaryn jáne Qarýly Kúshterdiń basqa da is-sharalaryn medıtsınalyq qamtamasyz etedi, sondaı-aq elimizden tys jerlerde de óz mindetterin abyroımen atqaryp júr. Qazaqstandyq bitimgerlik kontıngent quramynda Golan jotasynda áskerı dárigerler áskerı qyzmetshilerge, qajet bolǵan jaǵdaıda jergilikti turǵyndarǵa da medıtsınalyq kómek kórsetip keledi.
Búginde áskerı medıtsına jyl sanap damyp keledi. Onyń quramyna segiz áskerı gospıtal, tórt lazaret, Ortalyq áskerı-dárigerlik komıssııa, sanıtarııalyq-epıdemıologııalyq bólimsheler jáne medıtsınalyq bilim berý uıymdary kiredi.
Áskerı medıtsına ınfraqurylymyn jandandyrýǵa da búgingi kúni basa mán berilgen. 2024 jyly Aqmola oblysynyń Şýchınsk qalasynda Qorǵanys mınıstrliginiń Bas áskerı klınıkalyq gospıtali bazasynda aýyr syrqattar men jaraqattardan keıin áskerı qyzmetshilerdi ońaltýǵa arnalǵan bólimshe ashyldy. Astana men Almaty qalalaryndaǵy áskerı gospıtaldardy rekonstrýktsııalaý jáne tehnıkalyq jańǵyrtý jumystary jalǵasýda, Semeı qalasyndaǵy áskerı gospıtalǵa kúrdeli jóndeý júrgizý aıaqtalýǵa jaqyn. Sonymen qatar Aqtaý qalasynda áskerı teńizshilerge arnalǵan gospıtal ashý jáne Almaty qalasynda Áskerı medıtsına akademııasyn qurý baǵytyndaǵy jumystar júrgizilip jatyr.
Budan bólek áskerı-medıtsınalyq mekemelerdiń materıaldyq-tehnıkalyq bazasyn nyǵaıtýǵa erekshe kóńil bólinedi. Sońǵy jyldary olar zamanaýı dıagnostıkalyq jáne hırýrgııalyq jabdyqtarmen, onyń ishinde kompıýterlik tomograftarmen, tsıfrlyq rentgenologııalyq keshendermen, ýltradybystyq dıagnostıka apparattarymen jáne endoskopııalyq júıelermen jabdyqtalyp jatyr.
Bilikti kadrlar daıarlaý basym baǵyttardyń biri bolyp qala beredi. Áskerı dárigerler elimizdiń jetekshi medıtsınalyq joǵary oqý oryndarymen birlesip daıarlanady. Qazirgi ýaqytta áskerı-medıtsınalyq mamandyqtar boıynsha 130-dan astam kýrsant pen áskerı ıntern bilim alyp jatyr. Bolashaq áskerı dárigerler sheteldik oqý oryndarynda da bilim alady. Jyl saıyn shamamen 1300 maman biliktilikti arttyrý kýrstarynan ótip, taktıkalyq medıtsına baǵdarlamalary boıynsha oqytylady.
Jyl saıyn áskerı-medıtsınalyq mekemelerde myńdaǵan áskerı qyzmetshi statsıonarlyq em alady. Tájirıbeli áskerı dárigerler joǵary bilikti medıtsınalyq kómek kórsetip, kúrdeli hırýrgııalyq operatsııalar da jasaıdy.
Áskerı dárigerdiń eńbegi kóp jaǵdaıda kózge kórine bermeıdi. Degenmen áskerı qyzmetshilerdiń densaýlyǵy, adam ómirin saqtaý jáne Qarýly Kúshterdiń joǵary jaýyngerlik ázirligin qamtamasyz etý olardyń kásibıligine, jaýapkershiligine jáne kez kelgen sátte kómek kórsetýge daıyndyǵyna tikeleı baılanysty.
Osydan buryn Qazaqstan desantshylary 26 jyldyq belesti baǵyndyrǵanyn jazǵan edik.
