8 óńirde týrıstik nysandarǵa aparatyn joldardy jóndep jatyr
ASTANA. KAZINFORM — Bul baǵyttaǵy avtomobıl joldarynyń jalpy uzyndyǵy 1,9 myń shaqyrym, onyń ishinde 2025 jyly 544,7 shaqyrym joldy jóndeý josparlanǵan. Bul týraly QazAvtoJol habarlady.
Іshki týrızmdi damytý jáne týrıstik aımaqtardyń kólik qoljetimdiligin arttyrý maqsatynda, bıyl elimizdiń 8 óńirinde respýblıkalyq mańyzy bar avtojoldarda jóndeý jumystary júrgizilip jatyr.
Aqmola oblysy
Elordadan 35 shaqyrym jerde ornalasqan tarıhı-mádenı nysan – «ALJIR» memorıaldy keshenine aparatyn R-2 «Astana – Qorǵaljyn» avtojolynda jóndeý jumystary júrgizilýde. 2025 jyly 19-58 shaqyrym aralyǵynda ortasha jóndeý jumystary bastaldy. Buǵan deıin 2017 jyly osy joldyń keıbir bólikterinde 42 shaqyrym jóndeldi.
Almaty oblysy
Týrıster kóp baratyn Kólsaı men Qaıyńdy kólderine jetýdi qamtamasyz etetin R-16 «Kókpek – Kegen – Túp – Jalańash – Saty – Qurmeti, Kólsaı kóline kireberis jolmen» avtojolynyń 3-24 shaqyrym aralyǵynda ortasha jóndeý júrgizilip jatyr. Sondaı-aq, A-6 «Kókpek – Kegen – Qyrǵyzstan shekarasy» avtojolynyń 26-41 jáne 68-88 shaqyrym aralyǵynda jumys jalǵasyp jatyr.
Jetisý oblysy
Alakól kóline baratyn A-7 «Úsharal – Dostyq» avtojolynda 2,9-180 shaqyrym aralyǵyndaǵy qaıta jańartý jumystary aıaqtaldy. Qazirgi tańda 180-184 shaqyrym aralyǵyndaǵy ýchaskede jumystar aıaqtalý satysynda. Sonymen qatar, tabıǵı nysan – Ánshi qumǵa aparatyn R-20 «Saryózek – Kóktal» avtojolynda ortasha jóndeý júrgizilýde. Jóndeý jumystary 0-45, 110-141 jáne 142-178 shaqyrym aralyǵyndaǵy ýchaskelerdi qamtıdy.
Batys Qazaqstan oblysy
Tarıhı-mádenı mańyzy bar Han Ordasy aýylyna aparatyn R-56 avtojolynyń barlyq uzyndyǵy (21 shaqyrym) boıynsha ortasha jóndeý jumystary júrgizilip jatyr.
Qaraǵandy oblysy
A-20 «Qaraǵandy – Aıagóz – Tarbaǵataı – Buǵaz» avtojolynda 98 shaqyrym jolda ortasha jóndeý júrgizilýde. Bul jol Qarqaralyǵa aparatyn negizgi baǵyttardyń biri.
Shyǵys Qazaqstan oblysy
Katonqaraǵaı óńiriniń biregeı tabıǵı aımaqtaryna, sonyń ishinde «Rahman qaınary» shıpajaıyna aparatyn R-25 «Óskemen – Altaı – Rahman qaınary» avtojolynyń 152 shaqyrymynda ortasha jóndeý jumystary júrgizilip jatyr.
Pavlodar oblysy
«Baıanaýyl» demalys aımaǵyna baratyn R-27 «Qalqaman – Baıanaýyl – Úmitker – Ýlıanovsk» avtojolynyń 82-231 shaqyrym aralyǵynda ortasha jóndeý jumystary júrgizilýde. Sonymen qatar, 2024 jyly 100-105 shaqyrym aralyǵyndaǵy ýchaske kúrdeli jóndeýden ótti.
Túrkistan oblysy
Tarıhı Saýran qalashyǵyna aparatyn M-32 «Samara – Shymkent» avtojolynyń 2055-2257 shaqyrym aralyǵynda ortasha jóndeý jumystary istelip jatyr.
Atalǵan jumystar jol qaýipsizdigin arttyrýǵa, qozǵalysty jaqsartýǵa jáne ishki týrızmdi damytýǵa baǵyttalǵan. Jol ınfraqurylymynyń jańarýy azamattardyń saparǵa shyǵýyna jaǵdaı jasap, Qazaqstannyń týrıstik baǵyttarynyń tartymdylyǵyn arttyrmaq.
Aıta ketelik Jambyl oblysyndaǵy joldaǵy aqaýlar úshin merdiger 1,9 mln teńge aıyppul tóleıdi.