8 óńirde aýyr júk tasymaldaý kólikteri qozǵalysyna qoıylǵan ýaqytsha shekteýler alyndy

NUR-SULTAN. QazAqparat - Aqmola, Aqtóbe, Shyǵys Qazaqstan, Batys Qazaqstan, Qaraǵandy (Qaraǵandy óńiri), Qostanaı, Pavlodar jáne Soltústik Qazaqstan oblystarynda 15 tamyzdan bastap aýyr júk tasymaldaý kólikteriniń qozǵalysyna qoıylǵan ýaqytsha shekteýler alyndy, dep habarlaıdy QazAqparat.

Eske salaıyq, jazǵy kezeńde mundaı kólikterdiń qozǵalysyna shekteýler 1 maýsym men 15 tamyz aralyǵynda saǵat 11:00-den 21:00-ge deıin aýa temperatýrasy 25 gradýstan joǵary bolǵan kezde engizilgen bolatyn.

QR Indýstrııa jáne ınfraqurylym mınıstrliginiń málimetine qaraǵanda, Almaty, Atyraý, Jambyl, Qaraǵandy (Jezqazǵan óńiri), Qyzylorda, Ońtústik Qazaqstan jáne Mańǵystaý oblystarynda aýyr júk tasymaldaý kólikteriniń qozǵalysyna qoıylǵan shekteýler 31 tamyzǵa deıin saǵat 10:00-den 22:00-ge deıin aýa temperatýrasy 25 gradýstan joǵary bolǵan jaǵdaıda kúshin saqtaıdy.

Jeke biligine 8 tonnadan asa júkteme túsiretin júk kólikteriniń qozǵalysyna shekteýler jyl saıyn engiziledi. Bul shekteýler halyqaralyq kelisimderge sáıkes júkter men jolaýshylardy halyqaralyq tasymaldaýdy, tótenshe jaǵdaılardyń aldyn alý jáne ony joıý jónindegi is-sharalardy júzege asyratyn, tez búlinetin taýarlardy, jolaýshylardy, júkterdi, bólýge kelmeıtin kólemdi ári aýyr júkterdi Qazaqstan Respýblıkasynyń zańnamasymen belgilengen tártip boıynsha tasymaldaıtyn kólikterge, sondaı-aq, joldarda qaıta jańartý jumystaryn júrgizý úshin merdiger uıymdarǵa berilgen kólikterge qatysty emes.