8 naýryzda Qazaqstandaǵy kóktemgi kezeńge boljam jasalady - Bozymbaev
ASTANA. QazAqparat - 8 naýryzda Qazaqstandaǵy kóktemgi kezeńge tolyq boljam jasalady. Bul týraly búgin Úkimet otyrysynda QR Energetıka mınıstri Qanat Bozymbaev málim etti,dep habarlaıdy QazAqparat.
«Sý tasqyny kezeńine negizgi boljam 2017 jyldyń naýryz aıynyń birinshi onkúndiginde qurastyrylatyn bolady. Qazirdiń ózinde aldyn ala boljam daıyndalǵan. Sý tasý kezeńinde Aqmola jáne Soltústik Qazaqstan oblystarynda ózenderdiń sý kólemi 30-50 paıyzǵa normadan artyq bolýy múmkin», - dedi Bozymbaev.
Osy oraıda ol sý deńgeıiniń qaýipti kórsetkishke jetýi yqtımal ekenin, ıaǵnı sý basý múmkindigin eskerý kerektigin atap ótti. Al Astana sý qoımasynda ótken jylǵy kólem bolady dep kútilýde.
Onyń sózine qaraǵanda, kóktemde Qaraǵandy oblysyndaǵy ózenderdiń sý deńgeıi jyldyq normada boljanyp otyr. Batys Qazaqstan, Aqtóbe, Atyraý oblystarynda ózender boıynsha sý kólemi normadan az kórsetkishte baıqalýda.
Alaıda, Reseı aımaǵynda qardyń qory men ylǵal deńgeıi joǵary bolǵandyqtan, elimizdegi atalǵan oblystardaǵy ózenderde sý deńgeıiniń jaǵdaıy nazarda bolýy kerek.
«Respýblıkadaǵy taýly jerlerde ylǵaldyń aýqymdy jınalýyna baılanysty Ońtústik Qazaqstan, Jambyl, Almaty, Shyǵys Qazaqstan oblystaryndaǵy ózenderdiń sý kólemi kóktemgi jáne jazǵy kezeńde 15-40 paıyzǵa normadan joǵary bolmaq», - dedi mınıstr.
Óz kezeginde Premer-Mınıstr Baqytjan Saǵyntaev búgingi aldyn ala boljam barlyq óńirler úshin berilgeni durys ekenin atap ótti.
«Osy málimetterdi óńirlerdegi áriptester jazyp aldy dep oılaımyn. Ótken jyldary óńirler sizderge qarasty gıdromet qyzmeti qajetti aqparatty satady dep shaǵymdanǵan edi. Eger de oblystar tıisti qarjyny tólemese, onda olar bul aqparatty bermeıtini aıtylǵan bolatyn. Meniń oıymsha, osyndaı tájirıbe bolmaıdy. Osy máseleni baqylaýǵa alyńyz», - dedi Úkimet basshysy QR Energetıka mınıstrine qaratyp aıtqan sózinde.
Sonymen qatar B. Saǵyntaev mınıstrden kóktemge arnalǵan naqtylanǵan aýa-raıy boljamy qashan beriletindigin surady.
«Búgin biz bastapqy boljamdy baıandadyq. 7-8 naýryzda biz sáýir-mamyr aılaryna sońǵy boljamdy jarııalaımyz», - dedi Bozymbaev.
