8 naýryzda qandaı gúlderge suranys artady
ALMATY. QazAqparat - 8 naýryz Halyqaralyq áıelder kúni kóktemniń ıisi ańqyp, aınalanyń barlyǵy gúlge oranatyn sát. Bul kúni gúlder men syılyqtardyń saýdasy jaqsy júredi.
QazAqparat tilshisi Almatylyqtardyń arasynda qandaı gúlge suranys bar ekenin anyqtap bildi. Almatynyń qaı buryshynda bolmasyn qazir gúlder satatyn dúńgirshekter tolyp tur.
Gúlderdiń eń arzanyn qalanyń tómengi aýdandarynan tabýǵa bolady. Bazarda tek qana bir jaýqazyn 350 teńge tursa, qalanyń joǵarǵy jaqtarynan 500 teńgege alýǵa bolady.
Al raýshan gúline suranys óte kóp. Raýshan gúliniń bir taly 500 teńgeden bastalady.
«Gúlderdiń baǵasy mereke kúnderi qymbattaıdy. Sebebi tapsyrys bergen elderde de gúl qymbattaıdy. Oǵan tasymaldaýdyń 30%-yn qosamyz. Gúldi ushaqpen tasymaldaýǵa qarjynyń basym bóligi jumsalady. Sosyn keden salyǵyn qosamyz», - dedi Kóterme bólshek saýda kompanııasynyń dırektory Vıktor Han.
Onyń aıtýynsha, tez solatyn gúlder ary ketse 5-aq kún ómir súredi. Sol sebepti bul gúlder eń qymbat. Bólshek saýdada bul gúlder baǵasy 50-120% deıin qymbattaıdy.
«Máselen, 80 sm bolatyn golland raýshan gúliniń 1 taly (Ekvador ılı Kolýmbııa) - 550 teńge turady. Bólshek saýdada biz ony 900 teńgege satamyz. Golland jaýqazyndary - 1 sort - 220 teńge, bólshek saýdada 400-500 teńgeden beremiz. Chılıde ósetin pıondar 2300 teńgeden alsaq, bólshek saýdada 4000-5000 teńgeden satamyz. 8 naýryzda olar taǵy 20-30%-ǵa qymbattaıdy», - dedi Vıktor Han.
Onyń aıtýynsha, qazaqstandyqtar arasynda eń kóp satylatyn gúl raýshan gúli.
