8 naýryz merekesinde áıelder erkekterge qaraǵanda aqshany kóp jumsaıdy - zertteý nátıjeleri
ALMATY. 26 aqpan. QazAqparat - Halyqaralyq áıelder kúninde qazaqstandyqtardyń 98 paıyzy bir-birine syılyq syılaýdy josparlap júr. Bul týraly «Hoým kredıt bank» AQ-nyń bul merekege degen jurtshylyq kózqarasyn anyqtaýǵa arnalǵan zertteýi kezinde anyqtaldy.
Telefon arqyly júrgizilgen saýalnamaǵa búkil Qazaqstan boıynsha bankten bir ret bolsa da nesıe alǵan 18 jáne odan joǵary jastaǵy 900-den astam respondent qatysqan. Olardyń 2,5 paıyzy bul kúndi qosymsha demalys kúni dep esepteıdi. Al er azamattardyń 47 paıyzy jáne áıelderdiń 53 paıyzy úshin bul meıram týystary men jaqyndaryna óz sezimin bildirý múmkindigi bolyp tabylady. 8 naýryzǵa dástúrli syılyq kosmetıka jáne parfıýmerııa bolyp otyr. Syılyqtarǵa jumsalatyn eń kóp soma 5-10 myń teńge bolmaq. Ony merekege syılyq satyp alýdy josparlap júrgen respondentterdiń 20 paıyzy ataǵan. Al 15 paıyzy 15-20 myń teńge kóleminde soma jumsamaq.
