8 Naýryz merekesi: ShQO-nyń áıelder qaýymy qan tapsyrýǵa shaqyryldy
ÓSKEMEN. QazAqparat - Shyǵys Qazaqstan oblysynyń Qan ortalyǵy Halyqaralyq áıelder kúni qarsańynda «Ledı-donor» baıqaýyn jarııalady, dep habarlaıdy QazAqparat Altaınıýs saıtyna silteme jasap.
ShQO Densaýlyq saqtaý basqarmasynyń málimetine sáıkes, konkýrsqa qatysý úshin áıelder qaýymy 19 aqpan men 5 naýryz aralyǵynda Qan ortalyǵyna baryp qan nemese qannyń komponentterin tapsyryp, tegin donor bolýy qajet.
«Qan tapsyryp bolǵan soń ortalyqtyń qabyrǵasynda sýretke túsip, ony Instagram jelisine nelikten donor bolǵanyn jaza otyryp jarııalaý qajet. Sondaı-aq, jelide @sentrkrovioskemen resmı paraqshasyn belgilep, #ledı_donor2019 jáne #VKOTsK heshtegterin qoıý kerek», - delingen baspasóz habarlamasynda.
Baıqaý sharttaryna sáıkes keletin fotosýretteri bar barlyq jarııalanymdar resmı paraqshaǵa salynyp, jeńimpaz onlaın daýys berý arqyly anyqtalady. Resmı paraqshalar: Facebook - VKOTsK, VK - «Shyǵys Qazaqstan oblystyq qan ortalyǵy» toby, Instagram - @centrkrovioskemen, OK - VKOTsK.
Daýys berý 6 naýryz saǵat 12:00-ge deıin jalǵasady. Jeńimpaz 7 naýryzda anyqtalyp, demeýshilerdiń arnaıy syılyǵymen marapattalady.
