8 naýryz kúni Ońtústik Qazaqstan turǵyndary 205 adamǵa artty

Bul týraly Densaýlyq saqtaý basqarmasynyń basshysy Muqan Egizbaev málimdedi, dep xabarlaıdy QazAqparat tilshisi.

 

Basqarma basshysy búgin №4 oblystyq perınataldy ortalyǵyna baryp, meıram kúni ómirge urpaq ákelgen analardy quttyqtady. Olardyń árbirine gúl syılap, nárestelerge qajetti buıymdar tartý etti.

 

«Oblysta mereke kúni 205 sábı týdy. Onyń 15-i osy №4 oblystyq perınataldy ortalyǵynda ómirge keldi. 15-tiń 9-y  - ul, 6-ýy  - qyz. Náresteli bolǵan analarymyzdy merekesimen quttyqtap, árbirine syı-sııapatymyzdy tapsyrdyq. Sábıleri úlken azamat bolsyn dep tileýlestik tanytyp jatyrmyz. Elbasymyzdyń demografııalyq saıasatyn qoldap, ana men balaǵa tıisti talaptarǵa saı jaǵdaıdyń barlyǵyn jasaımyz. Bıyl oblys ákimi Janseıit Qanseıitulynyń qoldaýymen medıtsınalyq mekemelerdi qajetti qural-jabdyqtarmen tolyqtaı qamtıtyn bolamyz. Sol maqsatta bıyl Saryaǵash jáne Shymkent qalalarynda bir-bir perınataldy ortalyq salýdy josparlap otyrmyz. Sonymen qatar, medıtsınasy damyǵan eldermen memorandýmdar jasap, mamandarymyzdy tájirıbe almastyryp, dárigerlerimizdiń biliktilikterin arttyryp jatyrmyz», - dedi Muqan Keńesbekuly.

 

Densaýlyq saqtaý basqarmasynyń málimetine súıensek, 205 sábıdiń de jaǵdaıy jaqsy. Bul kúni ómirge urpaq ákelgen analar oblystyń ǵana emes, elimizdiń demografııasyna qomaqty úles qosqany aqıqat. Olardyń arasynda «Altyn alqa», «Kúmis alqa» ıegerleriniń qataryn arttyrǵandar da bar. 

 

Esterińizge sala keteıik, kúngeıdegi kópbalaly analardyń sany jyldan jylǵa artyp keledi. Jyl basynan bergi málimet boıynsha, Ońtústik Qazaqstan oblysynda demografııaǵa úles qosyp júrgen analardyń sany 169 198 jetken. Onyń 6193-i Batyr ana bolsa, 25482-i «Altyn-alqa», 34744-i «Kúmis-Alqa» ıegeri. 8878-i І-ІІ dárejeli Ana Dańqy ordenimen marapattalǵan. 93901-i 18 jasqa deıingi 4 jáne odan kóp balasy bar analardyń qataryn tolyqtyrǵan.

 

2016 jyly óńirde 79195 náreste týǵan. Dúnıe esigin ashqan sábılerdiń ishinde 765-i egiz bolsa, 5-ýi - úshem.