8 naýryz qarsańynda aqmolalyq arýlarǵa qurmet kórsetildi
KÓKShETAÝ. QazAqparat - Halyqaralyq áıelder kúni qarsańynda Aqmola oblysynyń ákimi Ermek Marjyqpaev elimizdiń damýyna baǵa jetpes úles qosqan óńir áıelderin kele jatqan kóktem merekesimen quttyqtady, dep habarlaıdy QazAqparat tilshisi.
«Kókshetaý» mádenıet saraıynda ótken sharaǵa kóp balaly analar men chempıondardyń analary, belgili dárigerler, muǵalimder, polıtseıler, sportshylar, qoǵam ókilderi, kásipkerler sııaqty túrli salada eńbek etip júrgen názik jandar qatysty.
Aımaq basshysy atap ótkendeı, 8 naýryzdy merekeleý pandemııa kezeńinde oblysta dástúrli formatta ótkiziletin alǵashqy is-shara boldy.
«Sizderdi kóktemniń jáne áıel sulýlyǵynyń, beıbitshilik pen jasampazdyqtyń nyshany-Halyqaralyq áıelder kúnimen shyn júrekten quttyqtaýǵa ruqsat etińizder!»- dedi E.Marjyqpaev.
Bul kúni úsh kópbalaly ana «Altyn alqa» jáne jeti ana «Kúmis alqa» medaldaryna ıe boldy.
Óńirde barlyǵy 10 myńnan astam kópbalaly ana bar, olardyń ishinde alty myńnan astamy «Altyn alqa» jáne «Kúmis alqa» ıegerleri.
Eimizdiń jáne óńirdiń damýyna baǵa jetpes úles qosyp júrgen aqmolalyq áıelderdiń eńbegin aıta kele, aımaq basshysy soǵys ardagerlerin de toqtaldy.
Bul - Birjan sal aýdanynyń Makınke aýylynda turatyn Nına Skorıýkına jáne bıyl 100 jyldyq mereıtoıyn atap ótetin stepnogorlik Klavdııa Dorosh.
Sonymen birge, bul kúni balalary túrli salalarda erekshe jetistikterge jetip, Aqmola oblysynyń dańqyn shyǵarǵan analarǵa da alǵys aıtyldy.
Olardyń ishinde Irena Petrovna-Tokıo Paralımpıada oıyndarynyń chempıony Davıd Degtıarevtiń anasy, Gúlnar Eleshqyzy - jazýshy, rejısser-stsenarıst, «Qazaqstannyń 100 jańa esimi» jobasynyń jeńimpazy Aıdıe Aıdarbekovanyń anasy, Irına Vladımırovna – 2018 jylǵy álem chempıonatynyń qola júldegeri Karına Ibragımovanyń anasy, Vera Mıhaılovna - shańǵy jarysy boıynsha birneshe dúrkin chempıon jáne chempıonattardyń júldegeri Oljas Klımınniń anasy bar.
Saltanatty sharada qyz - kelinshekter men analarǵa gúl shoqtary úlestirilip, merekelik kontsertke ulasty.
