8 naýryz - Halyqaralyq áıelder merekesine qandaı syılyq jasaǵan jón – saýalnama
NUR-SULTAN. QazAqparat – Jyl saıyn 8 naýryz meıramy qarsańynda kóp adamdar jaqyndaryna qandaı syılyq jasasam eken dep oılanatyny ras. Qazir túrli syılyq jasap, tańqaldyrýdyń ádisi kóp. Árıne, erler qaýymy qaltasyna qaraı názik jandardy qýantyp ta jatady. Sonymen qyz-kelinshekterge qandaı syılyq jasaǵan durys ?
QazAqparat tilshisi astanalyqtardyń oı-pikirin bilip kórdi.
Nursultan:
- Meniń oıymsha, másele syılyqtyń qunyn da emes, bastysy áıel zatyna kóńil aýdarý kerek. Sonyń ózi jetip jatyr. 8 naýryzda áıelime kóbinese syılyq sertıfıkatyn tartý etemin. Al anama raýshan gúl qushaǵyn syılaımyn. Bizdiń áıelderdiń basqa ult áıelderine qaraǵanda ózindik ereksheligi bar. Ásirese Batys elderiniń ózindik mentılıteti bar. Olar tym erkin. Bizde qyz bala tárbıesine asa mán beriledi. «Áıel bir qolymen besikti, ekinshi qolymen álemdi terbetedi», - degen qanatty sózben tolyqtaı kelisemin.
Baǵdat:
- Vot ı prıshel etot den dolgojdannyı,
S vetrom proşalnym na Sever ýmchalas zıma,
Veter rezvıtsıa bespechnoı shaloı
S plech tvoıh nejnyh rvet polýshalok
Mılaıa jenşına – mat ı podrýga,
Jena ı nevesta
Pýst tebıa mılýet pýşaıa voına!
dep elorda turǵyny sózin názik jandarǵa óleń jolyn arnaýdan bastady. Menińshe, áıel zaty úshin basty syılyq, ol mahabbat, sezim. Otanǵa, anaǵa degen mahabbat.
Medet:
- Eń keremet syılyq názik jandarǵa kóńil bólý, gúl jáne sıýrprız jasaý. Mereke saıyn súıiktimdi jıi qýantýǵa tyrysamyn. Men ózim shetelde oqyǵanmyn, baıqaǵanym qazaq áıeli men ózge ult áıelderiniń arasynda aıyrmashylyq aıtarlyqtaı. Bizdiń tárbıe men ómirlik ustanymdar basqasha. Qazir áıel zatynyń deni táýelsiz bolǵysy keledi.
Gúlnár:
- Meniń jasym 60-qa kelip qaldy. Men úshin basty syılyq balalarymnyń amandyǵy men baqyty. Balalarym jetistikke jetse, odan artyq qýanysh kerek emes. Árıne, meıram bolǵan soń, gúl syılasa da qýanyp jatamyz. 8 naýryzda alǵan gúldiń jóni bólek. Kóktem kelip, qyz-kelinshekter qulpyra túsedi. Balalarym jyl saıyn gúl syılap qýantady, solar aman bolsyn.
Ernar:
- Áıel úshin basty syı ol otbasynyń tynyshtyǵy men amandyǵy. Áıelge keregi joldasy men balalarynyń únemi janynda bolýy. Merekede áıelime gúl, átir, al qyzyma oıynshyq syılaımyn. Bizdiń áıelder óte jigerli jáne ózindik minezi bar.
Jasulan:
- Eń durysy áıelge ózi qalaǵan zatyn syılaý. Meniń áıelime kelsek, barlyǵy onyń kóńil-kúıine baılanysty. Áıelimdi jıi qýantyp turýǵa tyrysamyn. Buǵan deıin iPhone jáne robot shańsorǵysh syıladym. Bıyl áli syılyq tańdap úlgermedim.
Roza:
- Áıel retinde aıtar bolsam, biz úshin bastysy jaqyndarymyzdyń amandyǵy. Shańyraqta shattyq oınap tursa, balalardyń kúlkisi estilse odan artyq qandaı syılyq kerek? Balalarym meni qýantyp jatady, syılyqtan buryn kóńil bólgeni mańyzdy. Jalpy áıel zatyna kóp nárseniń qajeti joq.
Mahabbat jáne Narǵyz:
- Bastysy jaqyn jandardyń deni saý bolsa. Qazir otbasy, bala tárbıesimen qatar jumysty qatar alyp júrgen áıelder kóp. Mansap qýyp jatqan názik jandar da az emes. Biz anamyzdy jaı kúni de, mereke kúni de qýantýǵa tyrysamyz.
Baqtııar:
- Áıel úshin basty syılyq otbasy shyǵar. Mereke kúni anam men áıelime syılyq jasap, qýantýǵa tyrysamyn. Qazaq áıeliniń sulýlyǵy men náziktigi bólek áńgime. Bizdiń áıelder aldymen otbasynyń qamyn oılap turady. Barsha názik jandy merekesimen shyn júrekten quttyqtaımyn!
Nursultan:
- Baıqaǵanym, qyz-kelinshekter úshin bastysy otbasy baqyty. Qyzdarǵa únemi nazar aýdaryp, kóńil bólgen jón. Árıne, kóńilden bólek, kútpegen syı jasap, qýantyp turý kerek. Jalpy jaqyn jandy qýantqanǵa ne jetsin.
Nurlan jáne Nurjan:
- Qazaq áıeliniń jaratylysy bólek. Qazaqta áıel zaty sabyrly, tárbıeli, shydamdy jáne ulttyq, otbasylyq dástúrlerdi saqtaı biledi. Bul tárbıe arqyly beriletin qasıet. Odan bólek, árıne úlkendi syılaý. Al syılyqqa kelsek, áıelge kóńil bólip, úıdiń tirshiligine kómektesseń, bala baqsań, sony ózi jetip jatyr. Sondaı-aq, merekege qaramastan jıi gúl syılap qýantyp turý qajet.
