8 naýryz merekesine oraı túrkistandyq kópbalaly analar bir rettik kómek alady

TÚRKІSTAN. KAZINFORM - Respýblıka boıynsha kópbalaly analardyń tórtten bir bóligi Túrkistan oblysynda turady.

Kóp balaly analardyń 117 927-si – 18 jasqa deıingi tórt jáne odan kóp balasy bar analar bolsa, 2175-si «Batyr analar». Sondaı-aq, óńirde 18 570 «Altyn alqa», 43 413 «Kúmis alqa» ıegerleri, 3264 I jáne II dárejeli «Ana dańqy» ordenimen marapattalǵan analar bar.

8 naýryz – Halyqaralyq áıelder kúnine arnalǵan merekelik is-sharalar josparyna sáıkes, óńir turǵyndarynyń áleýmettik az qamtylǵan bóligin, kópbalaly jáne tolyq emes otbasylarǵa qarjylaı jáne zattaı qoldaý kórsetý josparlanǵan.

Mereke qarsańynda «Altyn alqa», «Kúmis alqa» ıegerleri, «Ardaqty ana» ataǵyn alǵan, sondaı-aq I jáne II dárejeli «Ana dańqy» ordenimen marapattalǵan kópbalaly analarǵa bir rettik kómek qarastyrylmaq. Aýdandyq jáne qalalyq bıýdjet esebinen jalpy 63 myńnan astam adamǵa 484,8 mln teńgege jýyq qarjy qaralyp, ortasha eseppen 7864 teńgeden birjolǵy materıaldyq kómek kórsetiledi.

Aıta keteıik, búgingi tańda oblys boıynsha 31 933 adam nemese 5265 otbasy ataýly áleýmettik kómek alady. Onyń 62 paıyzy nemese 3252-si kópbalaly otbasy.

Eske salaıyq, budan buryn Shymkenttegi batyr analarǵa 5 AEK mólsherinde aqsha tólenetinin jazǵan bolatynbyz.