8 naýryz merekesine oraı Prezıdenttiń atynan memlekettik nagrada tabystaldy
ASTANA.KAZINFORM - Halyqaralyq áıelder kúni qarsańynda Qazaqstan Premer-Mınıstriniń orynbasary – Mádenıet jáne aqparat mınıstri Aıda Balaeva Memleket basshysynyń atynan túrli salada eńbek etip júrgen áıelderge memlekettik nagradalardy tabystady.
Qazaqstan Respýblıkasy Prezıdenti Qasym-Jomart Toqaevtyń Jarlyǵymen ǵylym, mádenıet, aqparat, arhıv jáne mýzeı isi salalarynyń, sondaı-aq qoǵamdyq ınstıtýttardyń ókilderi eldiń damýyna qosqan eleýli úlesi úshin joǵary nagradalarmen marapattaldy.
Mádenıet jáne aqparat mınıstrligi málimtinshe, saltanatty is-sharada Aıda Balaeva merekeniń aıryqsha mańyzyn atap ótip, mundaı marapattar qazaqstandyq áıelderdiń eren eńbegine, olardyń kásibı jaýapkershiligi men óz isine degen adaldyǵyna kórsetilgen laıyqty qurmet ekenin aıtty.
– Prezıdent Qasym-Jomart Toqaev el aldyndaǵy eleýli eńbekterińizdi joǵary baǵalap, sizderdi marapattaý týraly Jarlyqqa qol qoıdy. Bul memleket áıelderdiń qoǵamdaǵy rólin, olardyń otbasy qundylyqtaryn nyǵaıtýǵa, túrli salalardyń damýyna qosqan úlesin árdaıym joǵary baǵalaıtynynyń aıǵaǵy dep bilemin. Búgingi marapat sizderdiń jeke jetistikterińiz ǵana emes, otbasylaryńyzdyń, balalaryńyzdyń, ata-analaryńyzdyń, áriptesterińiz ben ózderińizben birge osy jolda kele jatqan ujymdaryńyzdyń ortaq eńbegine kórsetilgen qurmet, – dedi Aıda Balaeva.
Úkimet basshysynyń orynbasary qazaqstandyq áıelder qaı kezeńde de qoǵamda aıryqsha jasampaz ról atqaryp kele jatqanyn atap ótti. Onyń aıtýynsha, jaýapkershiligi, iske degen uqyptylyǵy jáne shynaıy janashyrlyǵynyń arqasynda áıelder kásibı qyzmette joǵary nátıjelerge qol jetkizip, mádenı ári rýhanı qundylyqtardy saqtaýǵa, qoǵamdyq ınstıtýttardy nyǵaıtýǵa jáne memlekettiń damýyna eleýli úles qosyp keledi.
«Qurmet» ordenimen Sh.Ýálıhanov atyndaǵy Tarıh jáne etnologııa ınstıtýtynyń bólim basshysy Baqytjamal Aıtmuhambetova, T.Shevchenko atyndaǵy memorıaldyq mýzeıdiń qor saqtaý jáne buqaralyq-ekskýrsııalyq jumys bóliminiń meńgerýshisi Aıgúl Balabaeva, sondaı-aq Semeı qalasyndaǵy F.Dostoevskııdiń ádebı-memorıaldyq mýzeıiniń bas qor saqtaýshysy Tatıana Tıtaeva marapattaldy.
«Eren eńbegi úshin» medalimen Ortalyq memlekettik ǵylymı-tehnıkalyq qujattama arhıviniń dırektory Baıan Jumataeva, Konfessııaaralyq jáne dinaralyq dıalogty damytý jónindegi halyqaralyq ortalyqtyń bas ekonomısi Raýshan Imantaeva, Batys Qazaqstan oblystyq tarıhı-ólketaný mýzeıi janyndaǵy A.Pýshkınniń mýzeı úıiniń meńgerýshisi Asyljan Myrzabolatova, Qazaqstan Respýblıkasy Ulttyq Banki Qolma-qol aqsha aınalysy departamentiniń banknottar men monetalar dızaıny basqarmasynyń bas mamany-dızaıneri Janna Núgerbek, sondaı-aq «Habar» telearnasynyń «7 kún» baǵdarlamasy orys redaktsııasynyń redaktor-taldaýshysy Alma Orazbaeva marapattaldy.
Aıta keteıik, Aqordada eldiń damýyna úles qosqan qyz-kelinshekterge memlekettik nagradalar tabystaldy.