8 myńǵa jýyq elordalyq oqýshy áleýmettik kómekke ıe boldy
ASTANA. QazAqparat - Elordada jyl saıyn 1 tamyzdan 30 qyrkúıekke deıin «Mektepke jol» respýblıkalyq aktsııasy ótkiziledi. Astana qalasynyń Bilim basqarmasynyń habarlaýynsha, bıylǵy aktsııa aıasynda №13, 45, 55 mektepterde halyqqa konsýltatıvtik kómek kórsetetin qoǵamdyq qabyldaýlar jumys istedi. Shara barysynda 82-ge jýyq elorda turǵyny kómekke júgingen, dep habarlady qalalyq ákimdiktiń baspasóz qyzmetinen.
Astana qalasynyń Kásipkerlik jáne ónerkásip basqarmasynyń uıymdastyrýymen tamyz aıynda oqý jyly qarsańynda ortalyq alańda mektep jármeńkesi ótti. Jármeńkede Astana, Almaty jáne Qaraǵandy óńirleriniń 30 shaqty kásipkerleri men taýar óndirýshileriniń qatysýymen mektep formasy, oqýǵa qajetti qural-jabdyqtar, oqýlyqtar naryqtaǵy baǵadan arzandatylyp satyldy. Shara barysynda az qamtylǵan jáne kóp balaly otbasylardan shyqqan 8 727 balaǵa jalpy soma 92 mıllıon 156 myń teńgege kómek kórsetildi. Aıta keteıik, byltyrǵy jyly «Mektepke jol» aktsııa barysynda 68506,2 myń teńge kóleminde 7 667 balaǵa kómek kórsetildi. Jyl saıynǵy sharanyń maqsaty - jetim, ata-anasynyń qamqorlyǵynsyz qalǵan balalarǵa, turmysy tómen jáne kóp balaly otbasylardan shyqqan balalarǵa qoldaý kórsetý, olarǵa qoǵamnyń qamqorlyǵyn sezinýge múmkindik berý.
