8 myń densaýlyq nysanynyń árbir ekinshisinde sanıtarlyq talaptar buzylǵan – mınıstrlik

NUR-SULTAN. QazAqparat – Qazaqstanda tekserilgen myńdaǵan densaýlyq saqtaý nysanynda sanıtarlyq talaptar buzylǵan. Bul týraly QR Densaýlyq saqtaý mınıstriniń birinshi orynbasary Marat Shoranov málim etti, dep habarlaıdy QazAqparat tilshisi.

«Tekserý nátıjesinde 8 myń densaýlyq saqtaý nysanynyń árbir ekinshisinde sanıtarlyq talaptardyń buzylǵany anyqtaldy. Olardyń 94% sanıtarlyq-epıdemıologııalyq talaptardy buzǵan. Jáne nysandardyń 6% sanıtarlyq-tehnıkalyq jaǵdaı qanaǵattanarlyqsyz deńgeıde bolyp shyqty. Jergilikti atqarýshy organdar men densaýlyq saqtaý basqarmalarynyń basshylary bul máseleni erekshe baqylaýǵa alýy tıis. Olar medıtsınalyq uıymdarda epıdemııaǵa qarsy is-sharalardyń saqtalýy men iske asyrylýyn qamtamasyz etýi qajet», - dedi Marat Shoranov mınıstrlik alqasynyń keńeıtilgen otyrysynda.

Sondaı-aq vıtse-mınıstr bilim berý mekemelerinde de jaǵdaıdyń máz emes ekenin jetkizdi.

«Bilim berý nysandarynda da joǵarydaǵydaı jaǵdaı. Árbir úshinshi bilim berý mekemesinde sanıtarlyq-epıdemıologııalyq talaptar saqtalmaǵan. Sonymen qatar mektep jıhazdarynyń talapqa sáıkes kelmeý jaǵdaıy anyqtaldy. Bul baqylaýdyń joqtyǵyn kórsetip otyr», - deıdi ol.