8 myń áskerı men 2 myń tehnıka: Qorǵanys mınıstri oqý-jattyǵý barysyn tekserdi
15 sáýir kúni «Kóktal» oqý-jattyǵý polıgonynda «Aıbalta - 2019» strategııalyq komandalyq-shtabtyq oqý-jattyǵýy bastalǵanyn buǵan deıin habarlaǵan bolatynbyz. Ol 3 mamyrǵa deıin jalǵasady.
Mınıstr oqý-jattyǵý aýmaǵynda áskerlerdiń praktıkalyq is-qımyldaryn baıqap, polıgonnyń ınfraqurylymdyq nysandaryn tekserdi.
«Zamanaýı qaýip-qaterlerdi eskere otyryp, áskerlerdi jaýyngerlik qyzmettiń negizderine sapaly oqytýǵa, qarý-jaraq pen áskerı tehnıkanyń tıimdi qoldanylýyna, sondaı-aq oqý-jattyǵýdy ótkizý kezinde qaýipsizdik sharalarynyń saqtalýyna erekshe nazar aýdardy», - delingen Qorǵanys mınıstrliginiń aqparatynda.
Sapar qorytyndysy boıynsha N.Ermekbaev strategııalyq komandalyq-shtabtyq oqý-jattyǵýdyń sapaly ótkizilýi men bólimshelerdiń jaýyngerlik ázirligin jáne jaýyngerlik qabiletin odan ári arttyrý boıynsha birqatar naqty tapsyrmalar berdi.
Oqý-jattyǵýǵa Qurlyq áskerleri, Áýe qorǵanysy kúshteri, Arnaıy operatsııalar kúshteri, arnaıy jáne materıaldyq-tehnıkalyq qamtamasyz etý áskerleriniń áskerı bólimderi men bólimsheleri tartyldy. Jalpy alǵanda, manevrge shamamen 8 myń áskerı qyzmetshi jáne 2 myńnan astam qarý-jaraq pen áskerı tehnıka, onyń ishinde maıdandyq jáne armııalyq avıatsııa jumyldyrylǵan.
