8 mln. teńgege jýyq qarajatty qaǵyp ketken qaraqshylar quryqtaldy
ASTANA. 8 tamyz. QazAqparat - Almaty qalasynyń krımınaldyq polıtsııa qyzmetkerleri 58 jastaǵy áıel adamǵa qatysty jasalǵan qaraqshylyq shabýyl qylmysyn ashty.
Bul týraly búgin ІІM ótken brıfıng barysynda málim boldy.
Mınıstrdiń baspasóz hatshysy Nurdildá Orazdyń aıtýynsha, aǵymdaǵy jyldyń maýsymynda 34 jastaǵy Shyǵys Qazaqstan oblysynyń turǵyny bir top adammen birigip qylmysqa barady. Olar ózderin gaz sharýashylyǵynyń qyzmetkerimiz dep tanystyryp, jeke úılerdiń birine kirip, keıinnen ańshylyq sholaq myltyqpen qorqytý jolymen jábirlenýshiniń 8 mln.-ǵa jýyq (7 mln 966 myń.) aqshalaı qarajatyn ashyq túrde ıemdengen.
«Tekseris barysynda kúdiktiniń buryn da tonaýshylyq qylmysy úshin qylmystyq jaýapkershilikke tartylǵany anyqtaldy. Qazirgi ýaqytta ustalǵandar Almaty qalasy ІІD ýaqytsha ustaý abaqtysyna qamaýǵa alyndy. Osyǵan uqsas jasalǵan qylmystarǵa qatystylyǵy da tekserilýde. Qaraqshylyq shabýyl qylmysy boıynsha qylmystyq is qozǵaldy, tergeý amaldary júrgizilýde», - deıdi baspasóz hatshysy.
