8 mln adam deklaratsııa tapsyrmaıdy: mınıstrlik jańa Salyq kodeksi boıynsha túsinik berdi

ASTANA. KAZINFORM — Qarjy vıtse-mınıstri Erjan Birjanov deklaratsııa tapsyrýdan bosatylatyn azamattardyń sanatyna qatysty túsinik berdi.

Atap aıtqanda, qazaqstandyqtardyń bir bóligi, ıaǵnı 8 mln adam deklaratsııa tapsyrýdan bosatylatyny osyǵan deıin aıtylǵan edi. 

- Búgin Senattyń jalpy otyrysynda jeke adamdar úshin deklaratsııa tapsyrýdyń tórtinshi kezeńinen bosatý máselesi qaraldy. Degenmen, tsıfrlyq aktıvter boıynsha deklaratsııa tapsyrý saqtalady, - dedi E. Birjanov Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, jańa Salyq kodeksi tolyq bekitilse, 8 mln adam deklaratsııa tapsyrmaıdy.

- Muny nelikten jasadyq? Máselen, mekemelerde jumys isteıtin adamdar kásipkerlikpen aınalyspaıdy. Sonymen qatar, stıpendııa alatyn stýdentter men járdemaqy alatyn adamdar bar. Osy sanattaǵy adamdar boıynsha eseptilik men tólengen salyq týraly málimetti jumys berýshi men ókiletti organdar usynady. Sondyqtan osy sanattaǵy adamdardyń derekteri memlekettik bazada kórinip tur. Osy oraıda olarǵa eseptilik tapsyrý kerek emes degen sheshimge keldik, - dedi vıtse-mınıstr.

Eske salsaq, byltyr kúzde Qarjy mınıstri Mádı Takıev deklaratsııa tapsyrýdan bosatylatyn sanatty ataǵan edi.

Alǵashqy úsh kezeńniń nátıjesinde, jalpyǵa birdeı deklaratsııalaý júıesine 4,8 mln adam, onyń ishinde memlekettik qyzmetshiler, kommertsııalyq uıymdardyń, kvazımemlekettik sektordyń basshylary men quryltaıshylary jáne olardyń jubaılary kirdi. 2025 jyldan bastap deklaratsııalardy usyný boıynsha mindettemeler azamattardyń qalǵan sanatynda týyndaıdy. Bul - shamamen 8 mıllıon adam. Osyǵan baılanysty, avtomattandyrylǵan salyqtyq baqylaý múmkindikterin eskere otyryp, osy sanattaǵy 4-shi kezeńge kiretin azamattardyń aktıvteri men mindettemeleri týraly deklaratsııalardy tapsyrýdan bosatý usynyldy. Olar: jeke qurylymdardyń qyzmetkerleri, zeınetkerler, úı sharýasyndaǵy áıelder, stýdentter jáne basqalary.