8 myńnan astam fılmniń arasynan úzdik shyqqan qazaqstandyq avtor AI kınonyń bolashaǵyn baǵamdady

Myrzahan Jumahan festıvalge úsh qysqametrajdy fılm usynǵan. Sonyń ishinde kórermenge «I Was Just a Joke» týyndysy halyqaralyq ádil qazylar alqasynyń nazaryna ilikken. Baıqaýǵa 125 elden 8 myńnan astam jumys túskenin eskersek, avtordyń bul jeńisi Qazaqstandaǵy AI kınosynyń áleýetin kórsetetin nátıjelerdiń biri deýge bolady.

Jeńimpazdyń aıtýynsha, fılmdi jasaýǵa shamamen bir jarym apta ýaqyt ketken. Onyń aldynda áldeqaıda kúrdeli týyndyǵa bir aıǵa jýyq ýaqyt jumsap, myń dollardan astam qarajat shyǵarǵan. Alaıda onyń ornyna qarapaıym ıdeıaǵa qurylǵan «I Was Just a Joke» júldege jol ashqan.

— Bastapqyda men de kúrdeli dúnıe jasaýǵa tyrystym. Jasandy ıntellektini qoldanatyndardyń kóbi ǵarysh, fantastıka, úlken dekoratsııalar sekildi aýqymdy dúnıelerge umtylady. Men de sondaı baǵytta oıladym, keıin tájirıbe jınaqtaǵan saıyn qarapaıymdyqqa qaıta oraldym. Qazylar alqasy ondaǵan, júzdegen fılm kórgen kezde kúrdeli dúnıelerdiń arasynan qarapaıym fılmniń ózindik ereksheligi baıqalýy múmkin dep oıladym. Sondyqtan bul joly kórermenniń kóńilin kóteretin, aýyr oıǵa jetelemeıtin týyndy jasaǵym keldi, — dedi Myrzahan Jumahan.

Fılmniń basty keıipkeri de osy ustanymǵa saı tańdalǵan. Avtor adam men úı janýary arasyndaǵy baılanysty ázil arqyly kórsetý úshin ıttiń beınesin paıdalanǵan. Onyń aıtýynsha, bala kezinen úıinde mysyq, ıt, taýyq, qoı sekildi túrli janýar bolǵany da shyǵarmashylyq sheshimine áser etken.

Týyndynyń taǵy bir ereksheligi — fılm japon tilinde jasalǵan. Myrzahan Jumahan japon tilin ózi bilmeıtinin, dıalogtar men stsenarııdi jasandy ıntellekt kómegimen ázirlegenin aıtty. Keıin mátindi japon tilin biletin adamǵa teksertken.

Avtordyń sózinshe, belgili bir tildi tańdaý arqyly AI jasaǵan beıneniń shynaıylyǵyna da yqpal etýge bolady. Ol ózi paıdalanǵan modeldiń japon tilindegi kórinisterdi tabıǵı jetkizetinin baıqap, osy baǵytty ádeıi tańdaǵan.

Myrzahan Jumahan aıtýynsha, tehnologııa qansha damyǵanymen, shyǵarmanyń ózegindegi ıdeıany qalyptastyryp, ony durys baǵyttaıtyn adam qajet.

— Jasandy ıntellekt — qural ǵana. Adam balta ustasa, balta ózi ormandy shaýyp tastamaıdy. Barlyǵy adamnyń ıdeıasynan bastalady. Men aldymen óz oıymdy qalyptastyrdym, sodan keıin ony jasandy ıntellektige jetkizdim, festıvaldiń talaptaryn engizdim, túrli nusqalardy talqyladym. Sóıtip baryp fılm dúnıege keldi. Sondyqtan jasandy ıntellekt bárin ózi jasap beredi degen túsinik durys emes, negizgi shyǵarmashylyq sheshim báribir avtordyń ózine baılanysty, — dedi ol.

Myrzahan Jumahan AI tehnologııasynyń kıno salasyna ákelgen eń úlken ózgeristeriniń biri retinde qarjy múmkindigine táýeldiliktiń azaıýyn atady. Buryn aýqymdy kórinister men kúrdeli óndiris úshin úlken komanda men qomaqty bıýdjet qajet bolsa, qazir shyǵarmashylyq ıdeıany az qarajatpen júzege asyrýǵa múmkindik bar.

— Osydan on jyl buryn kıno salasynda eń úlken múmkindikter Gollıvýdta boldy, óıtkeni úlken fılm jasaý úshin úlken bıýdjet kerek edi. Qazir jasandy ıntellekt bul aıyrmashylyqty azaıtyp jatyr. Mysaly 500 nemese 1000 dollardyń ózimen bes mınýttyq fılmdi óte joǵary deńgeıde jasaýǵa bolady. Sondyqtan endi mańyzdysy kimniń bıýdjeti kóp ekeni emes, kimniń ıdeıasy myqty ekeni dep oılaımyn. Bul Qazaqstan sııaqty elderge álemdik deńgeıde básekege túsýge múmkindik beredi, — dedi qazaqstandyq avtor.

Sonymen birge ol jasandy ıntellekt adamnyń shyǵarmashylyqtaǵy ornyn tolyq basyp ketýi múmkin degen pikirge de toqtaldy. Onyń sózinshe, keıbir kásipter tehnologııanyń damýyna baılanysty túbegeıli ózgerýi múmkin. Al kıno men ónerde adamnyń tabıǵı emotsııasy men shynaıy bolmysyna degen suranys kerisinshe qaıta kúsheıýi yqtımal.

— Qazir jasandy ıntellekt adamnyń emotsııasyn, qımylyn, oıyndaǵy kórinisti óte jaqsy jetkize alady. Bolashaqta onyń múmkindigi odan ári arta túsetini anyq. Biraq tehnologııa adamdy tolyq almastyrǵan saıyn shynaıy adamǵa degen qyzyǵýshylyq qaıta oralýy múmkin. Adamnyń ózi ekranda oınaýy, onyń tabıǵı emotsııasy men bolmysy qaıtadan qundylyqqa aınalady dep oılaımyn, ıaǵnı belgili bir kezeńde tehnologııanyń sharyqtaýynan keıin adamdardyń shynaıylyqqa qaıta bet burýy yqtımal, — dedi ol.

Avtor kelesi jumysynda horror janryna den qoıǵysy keledi. Onyń maqsaty — kórermendi jaı ǵana qorqytý emes, fılm aıaqtalǵannan keıin oılandyratyn týyndy jasaý.

Al festıvalden alǵan júldesin Myrzahan Jumahan kásibı bilimin jetildirýge, tájirıbeli rejısserlerden dáris alýǵa nemese ınvestıtsııalaýǵa baǵyttaýdy qarastyryp otyr.

Onyń aıtýynsha, jasandy ıntellektini meńgerýdiń eń tıimdi joly — ony kúndelikti shyǵarmashylyq nemese kásibı mindetterde paıdalaný. Sonymen birge tehnologııaǵa jeke málimetterdi engizgende aqparattyq qaýipsizdik máselesine muqııat qaraǵan jón.

— Eń bastysy — óz ıdeıańa sený, oǵan jetý úshin tabandylyq tanytý jáne óz jumysyńa syrt kózben qaraı bilý. Tek «meniń jumysym birinshi oryn alýy kerek» dep oılaý jetkiliksiz. Basqalardyń ne jasap jatqanyn kórý, olardyń pikirin tyńdaý jáne óz jumysyńdy soǵan qaraı jetildirý mańyzdy. Menińshe, jaqsy nátıje osy úsh nárseniń toǵysýynan shyǵady, — dedi Myrzahan Jumahan.

Aıta keteıik, buǵan deıin, Astana AI Film Festival kınofestıvaliniń jeńimpazdaryn jazǵan edik.