8 myńnan astam adamdy aldaǵan Amanat Drive qarjy pıramıdasynyń basshylary sottaldy
ASTANA. KAZINFORM — 8 myńnan astam adamdy aldap, 21 mlrd teńge jınaǵan qarjy pıramıdasynyń basshylary sottaldy.
Qonaev qalasynyń soty Amanat Drive qarjy pıramıdasynyń basshylaryna qatysty úkim shyǵardy Shúken K.K. kináli dep tanylyp, 8 jylǵa bas bostandyǵynan aıyryldy, al Úrátbek M.S. 1 jylǵa bas bostandyǵynan aıyryldy.
Qarjylyq monıtorıng agenttiginiń málimetinshe, sotqa deıingi tergep-tekserý barysynda QMA-nyń Almaty oblysy boıynsha departamenti pıramıdanyń 8 myńnan astam salymshyny tartqanyn, al salynǵan qarajattyń jalpy kólemi 21 mlrd teńgeden asqanyn anyqtady.
Eske salaıyq, uıymdastyrýshylar azamattarǵa jyljymaıtyn múlik pen avtokólikterdi tıimdi sharttarmen — paıyz tólemeı jáne keıin bólip tóleý múmkindigimen satyp alýdy usynǵan.
— Qylmystyq jolmen alynǵan kiristerdi zańdastyrý maqsatynda baqylaýyndaǵy zańdy tulǵalardy — «Allo, ne kerek» JShS, «I M@RKETING» JShS, «Gold SapaPremium» JShS paıdalana otyryp, kópdeńgeıli shema iske asyrylǵan. Atalǵan kompanııalar jarnama qyzmeti, jyljymaıtyn múlik jáne kólik naryǵyndaǵy taldaý men boljaý sııaqty qyzmetterdiń jalǵan jetkizýshileri retinde áreket etken. Jalǵan sharttar negizinde 1,8 mlrd teńgeden astam qarajat shyǵarylyp, qolma-qol aqshaǵa aınaldyrylǵan, — delingen habarlamada.
Tartylǵan qarajat esebinen sottalǵandar 2 páter jáne Lexus markaly 3 avtokólik satyp alyp, yqtımal tárkileýden jasyrý maqsatynda olardy senimdi adamdardyń atyna rásimdegen.
Sot atalǵan múlikti memleket kirisine tárkiledi.
Úkim zańdy kúshine engen joq.
Eske salaıyq, buǵan deıin qarjy pıramıdasyn qurǵan Oral qalasynyń eki turǵyny 5 jylǵa sottalǵanyn habarlaǵan edik.
